Whare Manuwhiri Maori I Te Parawhe.

Tame Parata.—E patai ana ahau ki te Minita mo te taha Maori ka pewhea te mahi a te Kawanatanga mo runga mo te pitihana a Teone Topi Patuki mo te whare manuwhiri i Te Parawhe?

Timi Kara.—E penei ana te ripoata o te Komiti Maori, me puare tonu he huarahi e tae atu ai nga tangata ki taua rahui me taua Whare manuwhiri hoki. Na kei te puare tonu te ara ma te moana, ma te waapu hoki, a e kore e pa e raru raru ki nga Maori. Na reira kahore e ritenga kia hanga he tikanga hou mo tenei mea.

Nga Maori O Waikato.

Hoani Taipua.—E patai ana ahau ki te Minita Maori mehemea ka whakarite tikanga inaianei tonu te Kawanatanga hei whakaora i te mate nui kua pa ki nga Maori o Waikato ki raro i runga i te waipuketanga o ta ratou whenua? Me panui tenei reta, he mea page 37perehi ki roto te Herara Nupepa o Akarana. E penei ana,—

"Kei Waikato ki waho, e tae ana ki kotahi rau nga Maori, tane, wahine, tamariki, kore rawa atu he kai, heoi nei anake, he kouka, he aruhe, he tuna takitahi. Me te apiti mai hoki ki etahi puhera paraoa he mea aroha mai na nga Pakeha. I te takiwa o te Kirihimete i pau katoa a ratou kai i te waipuke, a ko to ratou oranga i muri nei he mahi tapahi harakeke mo nga mira haro muka. Otiia i te mea kua ki nga repo katoa i te waipuke, kua kore e taea te harakeke, a kua mutu te mahi o nga mira. Kua ngaro a ratou whare, me a ratou taonga. Kua kore rawa atu a ratou rawa; kore rawa he hereni kotahi a taua iwi."

Na e patai ana ahau ki te Kawanatanga mei kore ratou e tere tonu te whai koha ki enei tangata e noho mate ana i te mea he ahua ke rawa tenei, a e kore e pai te waiho roa.

Timi Kara.—Kei te whakarite tikanga te Kawanatanga. Kua tae atu te whakahau kia Hori Wirikihana kia tukua he mahi rori ki nga tangata e pai ana ki te pera, me te atawhai hoki i nga tangata e mate ana. Nui atu te whakaaro o te Kawanatanga ki enei tangata.