Pire Rohe Potae Whakawa Take.

Timi Kara.—E motini ana ahau i te panui tuarua o tenei Pire. He mea poto noa iho tenei engari e pa ana ki tetahi whenua nui rawa atu i mahia e te Kooti Whenua Maori a kua wehewehea kia maha atu nga wehenga. Ko etahi o nga ota wehe o te Kooti e kiia ana kihai i whai mana na reira i paahitia he Ture i tenei tau kua hori ake nei hei whakamana. Na ko etahi o nga tiwhikete e meatia kia whakamana kihai i hainatia e te Tiati i mua o te paahitanga o taua Ture, erangi no nga rangi e rua i muri mai katahi ka hainatia, na reira kihai i uru ki taua Ture. Koia i homai ai tenei Pire hei whamana i aua tiwhikete. Kanui te hiahia o te Kawanatanga kia paahitia te Pire nei tate mea kei te roa haere. A kei te akiaki nga Maori ki te Kawanatanga kia tangohia ta ratou whenua ara ki te hoko, otiia kaore te Kawanatanga e kaha ki te pera, erangi me matua pau te toru marama hei tononga whakawa tuarua.

Te Roretana.—E patai ana mehemea kua tae mai ke ripoata mo tenei Pire i te Kooti Whenua Maori kia mohio ai nga tangata kaore i te aro ki nga ritenga penei.

Ta Rapata Taute.—Tera e parea tenei Pire ki te Komiti Maori pea.

Timi Kara.—Ae. Kua puta enei whenua katoa i te Kooti, kua oti te wehewehe. Kua oti te perehi ki te Apiti ki te Pire, nga ingoa o nga whenua katoa nei, a hei whakamana i nga tiwhikete o aua whenua nei, koia te take i homai ai tenei Pire. Tera e tukua mai nga pukapuka katoa o te Kooti me nga ota kei tirohanga ma nga mema o te Komiti Maori.

Panui tuaratia ana taua Pire.