Meiha Keepa.

H. K. Taiaroa.—He motini taku kia perehitia nga whaikorero i whakapuakina i te aroaro o te Komiti mo nga mea Maori mo runga mo te Pitihana, Nama 3, a Meiha Keepa ma. He mea tika kia taia nga whaikorero a Wi Parata raua ko Meiha Keepa i whakapuakina e raua i te aroaro o te Komiti, notemea hoki he putake nui ta raua i korero ai. He mea tika kia kitea e nga iwi Maori me nga Pakeha nga kupu whakamarama mo taua Pitihana. Kaua a kiia kaore he take o nga Maori ki aua putake e tonoa nei e ratou, me titiro hoki ki era atu iwi Pakeha Maori hoki o era atu whenua, kei te tono katoa kia tukua atu ki a ratou aua tu mana, a he mea tika kia tirohia a ratou kupu tautoko i ta ratou tono e mohiotia ai te tika o ta ratou tono. Kaua a te Pakere e whakahe mai M taku tono. E hara tenei i te mea nui e tonoa atu nei e au kia perehitia aua whaikorero. Mehemea ka kore e whakaaetia, tera e pouri a Meiha Keepa me te iwi nui katoa i uru ki taua pitihana. Me mahara koutou e 21,000 Maori i haina i taua pitihana, ko te hawhe tena o te iwi Maori, a ki te kore e whakaaetia kia perehitia, ka mahara ratou he pana atu tena na te Kaunihera i ta ratou inoi. Ki taku mahara he mea tika kia whakarongo atu tatou ki ta ratou inoi ka ata whiriwhiri ai i te tika. I tono ano a Meiha Keepa i te aroaro o te Komiti, kia perehitia ana whaikorero. I ki atu ano au tera e perehitia, me etahi hoki o nga mema o te Komiti i pera atu ano ki a ia. Tokorua ano nga kaikorero, a e hiahia ana au kia perehitia a raua korero. He nui ke nga moni e moumoua ana mo etahi mea kore tikanga, kaore i rite ki tenei. Ka tohe au kia perehitia kei ki nga Maori he huna ana e te Kawanatanga.

Te Pakere.—Ko maua anake ko te Tiamana o te Komiti nga mea kua kite i aua whaikorero, no reira au i tono atu ai kia waiho marie taihoa e tono—a kaore a Taiaroa i whakarongo mai ki taku, e kore au e kaha ki te tautoko i a ia.

H. K. Taiaroa.—Kaore au i mea kei te huna e koe aua whaikorero. Engari i mea au, mehemea ka kore e whakaaetia kia perehitia aua whaikorero, ka mahara nga Maori kei te huna e tatou, Kia kore ai e kitea e te katoa. Ko taua pitihana he mea tuku mai na te nuinga o te iwi Maori, a e tika ana kia kite ratou i aua whaikorero. I a te Taute e korero ana mo runga mo te Pitihana a Tawhiao, i ki ia he mema Maori ano kei roto kei te Paremete, e mahi tahi ana Ki te paahi i nga Ture. Na ko tenei tono e tonoa atu ana e au e te mema Maori, a he mea tika kia whakaaetia mai e te Kaunihera taku tono, Koia nei nga take e tono atu ai au M ta Kaunihera Ma whakaaetia taku motini.

Whakaaetia ana.