Pire Taiapa.

Meiha Ropata Wahawaha.— Motini kia tukua atu he kupu whakahau ki te Komiti mo nga mahi Paamu i a ratou e whiriwhiri ana i te Ture Taiapa kia mahia e ratou enei kupu whakatikatika, ara:—

"Ka whakatikatikaia e tenei te tekiona 2 o taua Ture, ara, ka apitiria atu ki te whakamaramatanga o nga kupu 'Whenua Maori' enei kupu, 'kia puta ranei he Tiwhikete Whaitaketanga i raro i nga Ture Tuku Whenua.'

"Ka whakakorea atu e tenei te tekiona 3 o taua Ture, a ko enei kupu me hoatu hei whakakapi mo era:—

"E kore tenei Ture e whaimana ki runga ki nga whenua Maori, haunga ia nga whenua kua whakawakia e te Kooti Whenua Maori, kua puta he pukupuka whakamaharatanga take, he tiwhikete ranei a taua Kooti, haunga ia nga tikanga ka whakaritea ake nei."

Ko te Ture Taiapa e pa anake ana ki te Pakeha, a e mea ana au kia rite tahi mo te Maori me te Pakeha, ara mo runga mo nga whenua Maori kua whakataua e te Kooti, kua takoto nga rohe i waenganui i nga hapu. E kore e pa he mate ki nga Maori i runga i nga tikanga o tenei Ture. Engari ano he whiu ia mo nga Maori mangere ki te mahi taiapa. Ko nga Maori o etahi takiwa kua mahi i o ratou whenua, kua mahi taiapa, kua whakanoho kau, hipi ki o ratou whenua, a i nga takiwa e noho tahi ana te Pakeha me te Maori, e tika ana ano ma te Pakeha e utu tetahi taha o te taiapa ina mahia e nga Maori, a mehemea na te Pakeha i mahi, e hiahia ana ranei ki te mahi taiapa ma te Maori ano e utu tetahi taha o taua. mahi.