Nga Korero Paramete: 1891-1895
Wenerei, te 17 o Hune, 1891
Wenerei, te 17 o Hune, 1891.
Nga Riihi O Nga Rahui O Te Tai Hauauru,
Te Hatihana.—Patai ana mei kore te Kawanatanga e homai he Pire hei whakahaere i nga Rahui o te Tai Hauauru i raro i nga ritenga o te ripoata o te Komiti Whiriwhiri o tera tau, tatemea i mua tata nei kua puta tetahi whakatau o te Hupirimi Piira Kooti, a kua pa te mate ki nga riihi, ara ki nga riihi i whakamana?
Te Paranihi—He take nui rawa tenei, a ki tona mahara kaore e marama te homai Pire hei whakamana i te whakatau o taua Komiti i te mea kua rere ke te ahua inaianei i raro i te whakatau hou o taua Kooti Piira. Me whakaaro tahi raua.
Nga Iwi O Ngatikuia me Rangitane.
Tame Parata.—Patai ana ki te Minitia Maori kua pewhea te mahi whakarite whenua mo aua Maori kore whenua. Kua nui noa atu nga tau e whakaari ana ia i tenei putake me te waiho noa iho e te Kawanatanga, me te paheke haere o nga whenua e rite ana hei taunga mo nga Maori. Taihoa, i te mea kua pau katoa nga whenua o te Karauna, ka utua ki tenei kupu. "Kua kore rawa he whenua inaianei he whakarite i te hiahia o aua Maori me te whakatau o te Roiara Komihana, ta te mea kua pau katoa nga whenua, kaore kau he wahi i toe."
Te Karimana.—I runga i te uaua o tenei take, kaore i kitea he whenua ma nga Maori e korerotia nei. A i te mea ka watea ia ka whakaarohia e ia he tikanga mo nga tangata Maori whenua kore, a kanui tona pai mehemea ka tohutohu mai te honore mema nana te patai nei i mua atu o te hokinga atu i Werengitana.
Te Pire Pooti Mema.
Te Taipua.—E tono ana ahau kia nukuhia te korero mo tenei take kia whakamaoritia taua Pire. Kia whai taima matou ki te hurihuri i ona ritenga i te mea e pa ana kia matou taua mea. E kore au e korero roa erangi ka tono ahau kia nukuhia mo tetahi takiwa poto.
Te Riiwi.—He wahi iti e pa ana ki te iwi Maori a kaore e tika kia nukuhia.
Taipua.—Ka motini ahau kia whakanukuhia.
Pootitia ana—
Nga ae | 23 |
Nga no | 35 |
Hinga ana te mootini, haere ana te korero mo taua Pire.
Taipua.—I te mea kua kore e pai te Kawanatanga ki te whakanuku i te Pire nei, kati me whai kupu ahau.
Te Tumuaki.—Kua korero ano te honore mema i te tuatahi, kaore e tika kia rua tunga ki te korero.
Haere ana te korero tuarua.