Nga Moni O Te Koroni.

I runga i te moni, £16,539, e pootitia ana mo te Kooti Whenua Maori, i ki mai te Minita Maori tera e whakatuturutia nga Tiati kia noho ki tona takiwa ki tona takiwa kia haere pai ai nga mahi.

Tame Parata. — Mehemea kua wehewehea nga whenua ki ia tangata kua kore e nui te mahi kimi kowai nga riiwhi mo nga tangata mate, erangi mehemea e rima tekau e ono te kau ranei nga tangata ki te poraka kotahi tera e taimaha te mahi. E kore hoki nga Kaiwhakawa Tuturu e ata mohio ki te reo Maori me te mahi whakapapa e kaha ai ratou te whakawa i nga tono riiwhi tupapaku. I whakamatauria e nga Kaiwhakawa Tuturu tenei tu mahi i mua a kihai i totika, ara i te wa ko Te Paranihi ano te Minita Maori.

Timi Kara patai ana he pewhea ra i kore e whakaaturia mai nga utu e hoatu ana ki nga Apiha o te Tari Maori?

Te Karimana.—E utua ana ratou i roto i te £7,000 e wehea aua ma nga Maori i raro i te Ture nui mo Niu Tireni o te tau 1854.

Timi Kara ki tona mohio i pootitia taua £7,000 hei tuku penihana, hoko rongoa hoko kai me era atu mahi awhina i te iwi Maori, a he mea hou te tango i taua moni inaianei hei utu i te Tari Maori.

Te Moa patai ana heaha nga ritenga o te moni £800 mo nga Komihana uiui Turi Maori.

Te Karimana.—Kaore. e taea e au te whakaatu mai, erangi kei te tepu o te Whare te pukapuka rihana o nga moni ra.

Te Pakarana.—Naku i tono kia homai taua pukapuka rihana a kitea ana £1,100 nga moni i pau, he nui rawa atu tenei, e £400 i pau mo te tuhinga i nga ripoata.

Te Kere.—E hara i te mea i moumoua aua moni.

Timi Kara.—Kaore e tika kia ki penei tetahi mema he maumau moni tenei mahi i te mea kei te kuare pea aua mema ki nga mahi a nga Komihana. Kei te taenga ki te wa e korerotia nuitia nga ture Maori tera e kitea he tikanga whai koha rawa kei taua ripoata.