Nga Hawhekaihe O Te Waipounamu.

Tame Parata.—Patai ana ki te Minita, mo nga Whenua kei hea e takoto ana nga whenua kua wehea mo nga hawhekaihe o Te Waipounamu? Kei te noho awangawanga tonu nga Maori o tera motu i te taringa roa tanga kei hea a ratou whenua. I te tau 1888 i paahitia he Ture e whakamana ana i nga kereme a nga hawhekaihe me te tuku atu i etahi wahi whenua mo ratou. A ahakoa kua maha nga tau kua pahemo nei kaore ano kia ahatia he ritenga mo ratou kahore he whenua kia tukua atu mo ratou. Nui atu tona hiahia kia tere te Kawanatanga ki te whakaoti i tenei mea.

Te Karimana.—E pa ana te patai nei ki nga motu e rua o Te Waipounamu; ko Te Make te Komihana a kua ki mai ia tera e roa te takiwa mahi e oti ai otiia kua wehea etahi whenua mo aua tangata kei Rakiura kei Kanatapere, kei Otakou kei Maparo, ara kei nga wahi e watea ana nga whenua Karauna.

Tahoraiti Reriwe Teihana.

Timi Kara.—Patai ana ki te Minita mo nga Mahi Nunui mehemea ka tono ia ki nga Komihana Reriwe kia tu te tereina motuhake ki Tahoraiti hei painga mo nga Maori me nga tini Pakeha e noho ana kei taua takiwa.

Te Hetana.—Tenei te utu mai a nga Komihana Reriwe mo taua tono, ara kua whakaritea te haerenga o nga tereina kia rite te hiahia o te nuinga o nga tangata. Na kei te pai noa atu nga tangata o Tahoraiti te haere atu ki Tanewake inahoki e rua tonu maero me te hawhe te pamamao, na reira e kore nga Komihana e kaha ki te whakaae kia tu te tereina ki te teihana i Tahoraiti.

Mema Maori Ki Te Whare O Runga.

Hoani Taipua.—Patai atu ana ki te Pirimia mehemea tena te Kawanatanga e whakaae ki te karanga i etahi tangata Maori hei mema ki te Whare o Runga inahoki e homai ana etahi ture e panui ana ki nga Maori o tenei motu?

Te Paranihi.—Kaore ano kia oti noa te hurihuri a te Kawanatanga mo page 15tenei mea ahakoa e mohio ana te Kawanatanga e tika ana kia whai mangai nga Maori ki reira. Taihoa ka ata whakaaroaro ai tenei take.

Nga Rahui Maori O Te Tai Hauauru.

Te Karimana motini ana kia whakaturia he Komiti Whiriwhiri hei uiui hei ripoata mo nga riihi kua whakamana o te Tai Hauauru o tenei motu kia apiti atu ki tetahi Komiti pera o te Whare o Runga ko Te One Hooro, ko W. Kere, ko Te Parata, ko Te Roretana, ko Te Wirihana, ko Hetana me ia hoki, me tuku mai te ripoata i roto i nga wiki e toru.

Te Kere.—Kauaka toku ingoa ta te mea ko ahau te Tiamana o te Komiti Maori.

Te Taipua e motini ana ahau kia Apititia atu te ingoa o Timi Kara.

Te Tumuaki me matua whai whakaatu ka tika te motini a Taipua.

Patua ana te ingoa o Te Kere.

Timi Kara.—He nui te mahi a te Komiti whiriwhiri o tera tau a ki tona whakaaro kaore he tikanga kia whakaturia tenei Komiti inaianei.

Te Taipua.—Kei te tautoko ahau i nga kupu a te mema mo te Tai Rawhiti. He nui nga Ture i paahitia mo enei rahui kihai i pai, kati kaua e peka mai te Kawanatanga inaianei ta te mea he Pire tona he whakahaere i enei whenua.

Tame Parata.—Kei te pena ano aku kupu me eni honore mema kua korero ra. Me waiho te mahi kia haere ana i roto o te Hupirimi Kooti.

Ko Kapa.—He whakaatu kau toku kei te topu a matou whakaaro i runga i nga take Maori.

Whakaaetia aua kia whiriwhiria taua Komiti.