Other formats

    TEI XML file   ePub eBook file  

Connect

    mail icontwitter iconBlogspot iconrss icon

Nga Korero Paramete: 1886-1890

Nga Rahui Maori O Te Tai Hauauru

Nga Rahui Maori O Te Tai Hauauru.

Hoani Taipua.—E patai atu ana ahau ki te Minita Maori,—(1.) Mehemea e mohio ana ia he tokomaha nga Maori e whai take ana ki nga rahui o te Tai Hauauru kahore e pai ki te tango i nga moni reti i te Kaitiaki o te Katoa mo nga whenua i riihitia, a ko te take i pera ai ratou he whakahe ki te Kaitiaki o te Katoa mo ana mahi riihi i nga whenua i te mea kahore ratou e pai kia riihitia? (2.) Mehemea e watea ana te Kawanatanga ki te whakarite i ta ratou whakaae ki te Whare i te tau 1887 i mea ra te Pirimia me tuku atu ki nga Maori te whakahaere o a ratou whenua?

Te Miterehana.—E mohio ana ahau he tokomaha nga Maori o te Tai Hauauru kua maha a ratou whakakahoretanga ki te tango i nga moni reti i te Kaitiaki o te Katoa. I rongo hoki ahau ko nga Maori kihai i pai ki te tango io ratou moni, he hunga kei raro i te mana o te Whiti, a kua ki mai a Renata te kaiwhakahaere o te Kaitiaki o te Katoa i te Takiwa o Taranaki he tokomaha nga tangata i turi ki te tango i a ratou moni i mua kua pai ki te tango i naianei, a he nui nga moni reti kua utua ki aua Maori i turi ra ki te tango. Na mo runga i te tuarua o nga patai kahore ano te Kawanatanga i watea ki te whakamana i ta ratou whakaaetanga i ki mai na te mema na i whakaaetia i te tau 1887. I te noho nga Komiti i runga i nga take o nga Rahui o Te Tae-Hauauru, a ka tae mai a ratou ripoata ki te Whare, ka tahi ka ahei te Kawanatanga te ki ka pehea ta ratou tikanga mo runga i aua take.