Nga Utu Mema.

Tame Parata.—E te Tumuaki, e pouri ana ahau i te mea ka korero ahau mo runga i tenei motini, erangi e mahara ana ahau he mea tika ano kia korero tia. I mea te mema mo Tanitana ki te Hauauru me whakahoki iho nga utu mo nga mema o te Whare kia £50 a ki ana ia ko te take i pera ai ia no te mea kua whakahokia iho nga utu o nga kaimahi a te Kawanatanga. E mohiotia ana i puta ake tenei whakaaro i runga i te motini kia whakahokia iho nga moni i roto i te pukapuka moni kia £50,000. Mehemea i haere motini a te mema nei i runga i te huarahi kia mahi noa nga mema o te Whare, a kia pera ano hoki nga Minita o te Karauna kua taukoto ahau i tana motini, heoi i te mea kihai i pera te huarahi o tana motini kahore aku whakaaro mo runga i tana motini. Me whakaaro taua mema ka nui te mate o Nui Tireni i naianei, heoi he mea tika kia whakahokia iho nga utu a nga kaimahi a te Kawanatanga e tae nei o ratou utu ki te £600 ki te £700. Ekore e tau he mate ki runga i aua tangata i te tangohanga i te £50 i runga i o ratou utu. Kahore he pai e kitea e ahau ina pahitia e tatou tenei motini. Ki taku whakaaro ko te mea tika me paahi he Pire hei whakatikatika i te Ture utu mema. Kua tupu mai te whakaaro i roto i ahau tera ahau e pai ki te korero roa mo runga i tenei take erangi kahore an e pai ki te whakaroa i te Whare.

Taiwhanga.—Ka pooti ahau ki te turaki i tenei motini. Mehemea e whakahokia iho ana nga utu mo nga mema me whakaae nga Minita o te Kawanatanga kia tangohia kia £500 kia £400, ranei i runga i o ratou utu. Kahore au e whakaae ki tenei mahi whakahoki iho i nga utu mo nga kaimahi a te Kawanatanga. Heoi te mahi a nga Minita he noho i roto i o ratou tari me te pene i roto i o ratou ringa, hei haina i o ratou ingoa ki runga i nga pukapuka. A kei nga heketari te taimahatanga o te mahi. Ko te mea tika kia rite tonu te utu a aua heketari ki a ratou mahi. I konei ka pootitia kia mau tonu nga utu i meatia kia patua.

No nga Ae e, 49; ko nga No te, 19.

Whakakorea ake te menemana a kia whakaitia nga moni huri ana te Whare ki te whakaputa moni mo te Koroni.