Nga Rahui Whakanohonoho Tai Hauauru.

I runga i te motini a Hoani Taipua, i whakaaetia kia whakatakototia ki te aroaro o tenei Whare: (1.) He ritaana e whakaatu ana i nga riihi katoa haunga nga riihi kua whakamana, kei te takiwa o te Tai Hauauru kua whakaitia nga moni reti, ara kua whakangawaritia e te Kai Tiaki o te katoa, a i raro i te mana o tewhea Ture mehemea tera he ture, i whakahokia iho ai. (2.) He ritaana e whakaatu ana i nga moni riihi i whakaritea kia utua i raro i nga whakahaerenga mo te riihitanga o aua rahui, me te moni reti kua whakaitia, te ahua o te mahi i whakaitia ai a no raro i te mana o tewhea Ture enei whakahaere. (3.) He ritaana e whakaatu ana i nga riihi katoa e takoto nama ana te moni reti, a no raro i te mana o tewhea Ture i whakaroaina nga whakahaere e te Kai Tiaki, i kore ai e tahuri ki te whiu i aua kai riihi kia whakaeangia e ratou aua nama.

I runga i te motini a Hoani Taipua i whakaaetia kia homai ki te aroaro o tenei Whare tetahi ritaana hei whakaatu ko ewhea riihi o te Tai Hauauru o tenei motu kua whakahaerea i raro i te tekiona 7 o "Te Ture Whakanohonoho Rahui o Te Tai Hauauru Ture Whakatikatika, 1887," nga ingoa o nga kai riihi, nga ritenga o nga riihi me nga moni e utua ana i raro i nga riihi tawhito me nga mea hou, nga ingoa o nga kaiwhiriwhiri, nga moni i pau i runga i te mahi apitereihana, a ma wai e utu aua moni.