.gif)
Nga Korero Paramete: 1886-1890
Paraire, te 5 o Hurae, 1889
Paraire, te 5 o Hurae, 1889.
Waea I Kihipane Ki Awanui.
Timi Kara.—E te Tumuaki e hiahia ana ahau ki te patai atu ki te Kawanatanga mehemea ka whakaarohia e ratou tetahi tikanga hei whakamaro atu i te waea i Kihipane ki Te Awanui i te tai rawhiti o Aotearoa. He mea nui te whakamarokanga o taua waea ki nga tangata o to takiwa ki Waiapu. He takiwa nui taua takiwa a ekore e maha ake nei nga tau tera e tini noa iho te tangata ki taua whenua. He nui te awangawanga o nga Maori me nga Pakeha o taua takiwa kia whai waea ratou hei tuku korero ki nga tini wahi o te ao, kahore ano tetahi moni o te koroni i titaria ki taua takiwa, a kahore ano hoki hoki tetahi mahi e mahia e te Kawanatanga i reira, kua tae te waea inaianei ki Uawa a e meatia ana kia whakamarokia taua waea kia wha tekau maero ki Waipiro. Na i runga i tenei patai aku he tono tenei naku kai te kaumarima maero atu te roa o te whakamarokanga kia tae atu ki te Awanui.
Ta Hare Atikini.—Tana utu mai kua puta te hiahia o te Kawanatanga kia whakanohia he moni ki runga i te pukapuka moni hei whakatu i taua waea.
Nga Ruri I Rotorua.
Taiwhanga.—E patai ana ahau ki te Minita Maori
mehemea e tika ana nga korero e kiia nei kei te tuku te Kawanatanga
i tetahi kairuri ki te ruri whenua i Rotorua poka ke i nga hiahia o
nga Maori kua riro mai i au tetahi waea na nga rangatira o Rotorua
he tono mai ki au kia kite ahau i te Minita Maori me te ki atu ki
aia kia kaua e tukua he kairuri kia haere ki reira inaianei. Ki taku
titiro iho na te mahi akiaki tonu a te Kawanatanga kia ruritia nga
whenua Maori e mate ai nga Maori. Na reira ano hoki i pa ai te mate
ki Whangarei. I kiia atu ano ki te Minita Maori kia kaua e tukua he
kairuri ki reira no te mea kei te whakatete nga iwi e rua page 18
tetahi ki tetahi,
heoi tukuna ana e ia he kairuri kia haere, ko tona tukunga iho ka
hinga ko nga Maori tokowha mate rawa. I Hokianga ano hoki tetahi
raruraru kihai i tukuna kia ruritia a unuhia ake e Mohi Tawhai tana
kereme ki waho. Ki taku i hiahia ai kia whakamana te tono a nga
rangatira Maori o Rotorua kia kaua e tukua nga kairuri kia haere ki
reira.
Te Retihana.—Tana whakahoki tera ano etahi kairuri kei Rotorua he mea tono mai ano na nga rangatira Maori o reira, erangi kihai i tino marama te tono a te rangatira na. Mehemea e whakamaramatia mai ana e ia ko tewhea te poraka kahore nei nga Maori e pai kia ruritia ka whiriwhiria e ia taua taua.