Takoha Kuri.

Meiha Ropata Wahawaha, i patai ki te Kawanatanga, Mehemea ranei e kore ratou e ata whakaaro tikanga mo te taake kuri, Ma whakakorea atu taua taake, kia whakahokia iho ranei nga utu i etahi o nga takiwa Maori? He patai tenei naku mehemea ranei e kore e whakaitia iho e te Kawanatanga nga taake kuri e utua ana i nga takiwa Maori, kaore nei he moni i nga tangata o aua wahi he pohara hoki. Na runga i te pakeke o te mahi a nga kaikohikohi o aua utu i huihui ai nga Maori, i tono ai hoki kia whakahokia iho te utu page 4mo nga kuri, e hiahia ana hoki ratou ki a ratou kuri, engari he kore moni hei utu i te taake. Na reira ka puhia nga kuri i waenganui tonu i nga tangata. E toru nga kuri a toku hapu i puhia, a te mate he tangata i te kaikohikohi, e tata tonu ana hoki nga kuri, i waenganui tonu i nga tangata e haere ana. I mea atu ano nga Maori kia whiwhi ratou i te moni ka utua e ratou nga taake; kaore hoki i whakarongo atu te kaikohikohi, puhia ana e ia nga kuri. He mate nui tenei e pa nei ki nga Maori. E korero ana au mo nga takiwa Maori i nga kainga o ro ngaherehere, kaore nei he pakeha e noho ana i reira, kaore hoki he whenua kua riihitia kua retia ranei. Koia nei taku e mea nei mo nga kainga Maori, kaore nei he pakeha e noho ana i reira.