Pire Kooti Whenua Maori.

Ta Hare Atikini.—Ka motini au inaianei kia whakaaetia nga menemana o te Kaunihera ki te rarangi 2.

Time Kara.— E kore au e tu ake ki te whakahe ki taua menemana. Ki toku mohio kua tae tenei ki te wa tika kia kaua e peneitia—otiia e ki ana nga kaumatua mohio atu ia ahau, kaore ano kia tae ki taua wa. E kore pea e nui te he mehemea ka tukua nga tamariki o nga hawhekaihe — haunga i te taha Maori, kia tu hei whakakapi i o ratou whanaunga kua mate. Engari mo nga paanga anake ki nga whenua kua paahitia e te Kooti Whenua Maori. Otiia tera e he mehemea ka tukua nga tamariki a nga hawhekaihe i te taha Pakeha kia whakatu kereme mo nga whenua Maori e papatupu ana, e mau ana i raro i nga tikanga me nga ritenga Maori ake. Me arai rawa ratou kia kaua e whai paanga ki nga whenua kaore kia paahitia e te Kooti, a kaore ano kia kimihia te whaitaketanga. Tera hoki e raruraru nga tikanga me nga whakahaere a nga Maori, e pupuri nei nga hapu me nga iwi i o ratou whenua i runga i te ahi ka, mehemea ka whakapuaretia te huarahi e haere mai enei tangata kua Pakehatia, ki te tango i nga papatupu. Ko ta mua tikanga, ma te kaha, ma te maia ki te pupuri ki te noho whenua i mau ai taua whenua. Otiia, i te mea ka moea e tetahi tangata te wahine o tetahi iwi ke, me te noho tonu atu mo nga whakatupuranga kotahi, maha atu, heoi kua kore te pa-page 93anga o taua tangata ki taua whenua i whakarerea e ia. A ki te marena he wahine Maori ki tetahi Pakeha, ka whanau ake he hawhekaihe, ka marena taua hawhekaihe ki te Pakeha ano, ka rua wehenga atu i te taha Maori a raua tamariki, a kaore he mana o ena tamariki ki nga whenua e puritia ana i raro i nga take Maori.