Title: Nga Korero Paramete: 1886-1890

Author: New Zealand Parliament, Legislative Council

Part of: He reo ture nō te taha Kāwana / Language of the Crown

Conditions of use

Share:

Pire Maori.

Taiwhanga. — Ka patai ki te Pirimia mehemea e pono ana te korero a tetahi nupepa ko te Niu Tireni Taima e ki ana kua oti e te Kawanatanga ratou ko nga mema Maori tetahi tikanga mo nga Pire Whenua Maori? He pouri nona i patai ai, ite mea e ki ana taua nupepa kua oti te tikanga a te Kawanatanga me nga mema Maori me mutu ta ratou whakatete mo nga Pire i te mea kua whakaae te Kawanatanga ki te whakakore i nga takoha me nga taake me te waiho hoki i te rarangi o te Ture Reiti Whenua Maori Whenua Karauna e whakaeke ana i te reiti ki nga whenua Maori a kaore ano ia kia mohio ki tenei whakaritenga e hara iaia. Otiia tera ia e whakaae mehemea ka whakaae hoki te Kawanatanga ki te patu i te rarangi 3 o te Pire Whenua Maori me te paahi i te Pire Whakaora Maori hei riwhi mo te Ture Whakahaere Whenua Maori. Ki te mea kaore te Kawanatanga e whakaae ki tenei, heoi ka whakatete tonu ia i nga wa katoa ki nga Pire Maori a te Kawanatanga.

Te Tumuaki. — Kauaka e korero te mema mo nga Pire i roto i te Ota Pepa me tatari marire kia tae ki te wa e mahia ai aua Pire, ko reira korero ai i tona mahara.

Taiwhanga. — E pouri ana ia mo tana korero pohehe. Otiia e kore ia e pera a muri ake nei. Ko te hiahia a ona hoa rangatira e hui nei ki Poneke he rite tonu ki nga mahara o te hui i tu ki Whanganui kia tukua mai ta ratou Pire hei riwhi mo te Ture Whakahaere Whenua Maori, 1886. E tono ana ia ki te Kawanatanga i runga i te ingoa o te Kuini kia whakamutua ta ratou hanga ture mo nga Whenua Maori.

Te Tumuaki. — Kei te haere i waho te korero a te mema ra. Me haere te korero i runga i te ara patai anake.

Taiwhanga.—Heoi ka mutu ana korero e hiahia ana ia kia whakaatu mai te Kawanatanga kowai nga mema Maori i whakaae ki nga Pire a te Kawanatanga.

Ta Hare Atikini. — Ahakoa he pai rawa te whakahoatanga mai o te mema ra ki a paahitia nga Pire a te Kawanatanga, e mea ana ia me kore noaiho pea te awhina o taua mema ite mea e kore ia e whakaae ki tana e tono nei. He aha koa. Ko te korero o te nupepa ra kaore i te tika. I penei ke te tikanga. I runga i te hiahia o te Kawanatanga kia tino marama nga mema Maori ki aua Pire ra me te whakarongo ki o ratou hiahia. Kua tahuri te Minita Maori ki te uiui ia ratou kia mahi tahi i aua Pire mei kore e oti pai he ritenga. A kei te hanga menemana te Kawanatanga inaianei hei whakarite i te hiahia o nga mema Maori, a ki te rite, ki te tupono, tera e tahuri mai aua mema ki te awhina i te Kawanatanga. Haunga te mema e patai nei. Kei waho ke noa atu pea ia ite mea kua whakaatu mai taua mema ra ki te kore e whakaaetia ana Pire ake ka whakatete tonu ia ki nga Pire a te Kawanatanga a ma tana mahi pera katahi ka whakahokia mai ia hei mema mo tenei Whare a muri ake nei.