Mahi Kimi Koura.

Hoani Taipua. — Ka patai ki te Minita Maori mehemea ka tahuri te Kawanatanga ki te arai i nga tangata e haere pokanoa ana ki runga ki nga whenua Maori ki te keri koura. Ko te take i pataia tenei mea e ia. Kua tae mai nga pukapuka a nga Maori o Taupo ki aia kei te ohorere a ratou ngakau i runga i tenei mahi pokanoa a te Pakeha. A tera e tupu he raruraru, mehemea he hiahia to te Pakeha ki te haere ki te whenua Maori kimi moni ai me matua pa atu ki te Kawanatanga, a ma te Kawanatanga e tuku whakaatu kia Wahanui ma me nga rangatira. Heoi kua pai, kua marama. Me mahara. tonu te Whare mo te matenga o tetahi Pakeha ko Mawhete te ingoa, i patua ki Taumaranui e nga Maori i roto i enei tau kua hori ake nei, te take he haere pokanoa, waihoki ko tenei, kanui tona tupato kei pa he raruraru i runga i te haere huna, haere pokanoa a etahi Pakeha ki nga whenua Maori.

Te Miterehana. — I raro tekiona 136 o "Te Tura Maina, 1886," ki te pokanoa te tangata ki te haere ki te kimi moni i runga i te whenua a tetahi Maori a kaore i te whakaae nga Maori, ka ahei te whaina i taua tangata kia kaua e iti iho i te £5, me kaua e rahi ake i te £50. E tukua ana he raihana ki etahi tangata kia haere ki te kimi moni i runga i te ritenga me whakaae ra ano nga Maori i raro i te tekiona 135 o taua Ture. A mo runga mo te takiwa e whakaaturia mai ra e te mema, he nui nga raiha kua tukua ki etahi tangata erangi i tuhi reta ano te Minita Maori mo ia Pakeha e whakaatu ana ki nga Maori no ratou aua takiwa, kei te haere atu a mea Pakeha a kei a ratou te tikanga mo te tuku atu mo te arai ranei. Na kaore e mana aua Pakeha ki te kimi moni mehemea e whakahe ana nga Maori. Mehemea kua pa he whakahe a nga Maori mo tenei mea tera e tahuri te Kawanatanga ki te uiui otiia kaore ano kia tae ake he kupu amu amu a tetahi Maori. Mehemea ka tohu tohu mai te mema ra ki te Kawanatanga nga ingoa o page 73nga Pakeha e haere pakanoa ana, ka tahuri te Kawantanga ki te arai ia ratou kia mutu rawa ai te haere huna.