Taite, te 19 o Hurae, 1888.
Kohuru I Waiapu.

Taiwhanga.—E patai atu ana ahau ki te Minita Maori ka pehea te tikanga a te Kawanatanga mo te mahi kohuru a W. Turei i Waiapu. E hiahia ana ahau ki te whakaatu ki te Kawanatanga, kahore nga Maori e hiahia ki te tango i te whakahaere o nga tikanga kia ratou anake. I ki mai te Pirimia ki te hui Maori i roto i tona ruma ekore e tika kia rua nga Kawanatanga mo Niu Tireni erangi kia kotahi anake. Kihai nga Maori i hiahia kia rua nga Kawanatanga, erangi e whakaaro ana nga Maori i runga i tenei mate, i te mea na te Maori i kohuru me tuku ma nga rangatira Maori e whakawa i te tuatahi, a ki te kitea e ratou kua hara taua tangata me tuku e ratou ki te Kooti Hupirimi kia taronatia. I penei hoki nga Maori i te kohuru tuatahi i Pewhairangi i mua noa atu. Kahore nga Maori i hiahia kia riro anake nga whakahaere ki a ratou anake. Erangi e hiahia ana ratou kia riro i a ratou te whakahaere o a ratou whenua, me te whakahaere i nga tikanga o nga mea kua whakahuatia ake nei e ahau.

Te Pakuha. — E whakaaro ana te Kawanatanga e ranea ana ano nga ture mo runga i tenei keehi. Me ki atu hoki ahau kei te whaia taua kaikohuru e nga Pirihimana, a ki taku whakaaro meake tata nei te mau ai.

Taiwhanga.—I mohio ano ahau ka pena ano te utu mai o taku patai i mua o taku tukunga atu i taua patai.