Whenua Maori.

Taiwhanga.—E patai atu ana ahau ki te Kawanatanga mehemea e tika ana te utunga o nga moni e piri nei ki te korero a te Minita Maori (ara) a te Makarini i te tau 1876, G.-10, a mehe-page 39mea e tika katoa ana nga hoko e pa ana ki te rarangi Apiti o nga poraka whenua i whakahuatia i roto i taku motini o te 12 o nga ra o Hune, 1888. I runga i te utunga mai a te Minita Maori mo tetahi patai aku o mua atu i tenei i mea ia ka tekau nga tau i muri iho i te utunga o nga moni ki nga tangata whaitake. Otira e mea ana ahau kihai aua moni i utua ki nga tangata tika, ko ahau me etahi atu nga tangata tika a ko taku i hiahia ai kia whakamaramatia mai e te Kawanatanga me te Whare tetahi huarahi e utua ai aua whenua, ka wha mano nga tangata kua whakanohia ki runga i aua whenua e te mema mo Whanganui ko ia hoki te Minita Maori o muri i tenei, tera taua Minita me ana Pakeha e pana i runga i aua whenua mehemea kahore e utua kahore au e pai kia whakawakia e te Ture. I mea toku iwi kia pana nga Pakeha erangi naku i ki atu me tuku te riri ra runga i te Ture. Ka tekau ma wha nga tau a kahore ano i puta mai aua moni. I muri iho i tera Paremete ka haere ahau ki te Pirimia ki te patai atu mehemea kahore e kitea e ia tetahi huarahi e taea ai e ia te utu i aua whenua. No te mea kahore ia e pai ki te kawe i taua keehi ki to Kooti Hupirimi, mehemea e kawea ana e ahau te keehi ki te Kooti Hupirimi a ki te hinga taua keehi e au ka wini katoa matou, a tera e whati taua hunga e wha mano ki Akarana. Otira kahore au e pai kia pera. Ko taku i hiahia ai kia nohia te whenua e te hunga mahi paamu, e te hunga e kaha ana ki te utu i nga reti ki a ratou, na ko taku i hiahia ai ki ata whiriwhiria tenei mea e te Kawanatanga i mua o taua kawe i taua keehi ki te Kooti. Te MITEREHANA.—Ko nga whenua e whakahuatia ana e te rangatira na he whenua i hokona i roto i nga tau maha kua hori ake nei ara i te wa e tu ana a te Makarini hei Minita Maori. Ki taku mohio kua utua noatia atu aua whenua ki nga tangata tika i runga i te whakataunga a te Kooti Whenua Maori. A kei te Kawanatanga nga Karauna Karaati mo aua poraka whenua katoa e whakahuatia na ta rangatira na. Heoi te utu ki te patai a te mema ara mo runga i te taha ki te Kawanatanga. A ka kitea katoatia nga korero i roto i te Pukapuka Paremete C.-7, 1885.