Nga Whai Korero O Nga Mema.

Hoani Taipua.—Ka patai ki te Kawanatanga mehemea kaore ratou e tohutohu kia puta wawe te pukapuka whai korero a nga mema Maori, inahoki e puritia ana taua mea kia pahemo nga marama maha i muri i te mutunga o te noho o te Paramete. Koia te take i hiahia ai au ki te ui. He aha te take i whakaroaina kia toru kia wha marama i muri o te Paremete ia tau ia tau, katahi ka puta mai. Ko nga iwi Maori kei te patai tonu ki nga mema. Ko awhea tukua mai ai nga korero o te Paremete. He nui no to ratou hiahia kia rongo korero. Na i te mea kua tu he Kawanatanga hou inaianei, heoi me tikanga hou hoki mo tenei mea. I tona taenga mai ki Poneke nei i te timatatanga o tenei nohonga o te Paramete, katahi ka puta mai nga whai korero a nga mema Maori o tenei Paramete kua mutu ake nei. E tino hiahia ana ia kia anga nui te whakaaro o te Kawanatanga ki tenei mea, a kia kaua hoki e whakaroaina i muri nei.

TE TUMUAKI.—Ka mea. Kua ui ui au, a ki mai ana ko te take whakaroa he nui no te mahi perehi i nga pukapuka reo Pakeha me era atu tini mea koina te take kaore i hohoro te perehi i te whai korero a nga mema Maori. Engari ka ata whakaarohia e au mei kore e taea te perehi wawe i taua pukapuka a muri ake nei.