Other formats

    TEI XML file   ePub eBook file  

Connect

    mail icontwitter iconBlogspot iconrss icon

Nga Korero Paramete: 1886-1890

Paraire, te 25 o Nowema,1887. — Korero Paipera I Roto I Nga Kura

Paraire, te 25 o Nowema,1887.
Korero Paipera I Roto I Nga Kura.

Tame Parata.—I mea e pa mai ana tenei Pire ki au, no te mea e mea ana kia akona te Paipera i roto i nga kura, no te mea hoki he maha nga tangata e hiahia ana kia akona te Karaipiture ki a ratou Tamariki a e tino whakaae ana ahau ki ta ratou. He nui nga tikanga i roto i nga kupu Ako Paipera nei. Katahi ia te mea kahore e marama ki au i roto i tenei Pire. kahore i whakaaturia mai ko tehea wahi o te Karaipiture e hia ana kia akona e ahua rereke ana te whakaaro o etahi mema i etahi. Ko etahi e hiahia ana kia korerotia te Paipere i roto i nga kura ko etahi e tino waakahe ana. Na ko te kupu tenei ko wai o ratou e tika ana, inahoki e kaha rawa ana te whakaaro kia korerotia te i karaipiture i roto i nga kura, e whakaaro ana ahau he mea tika kia whakamatauria a me titiro tonu atu tatou ki tona tukunga iho. Na ahakoa he maha nga tamariki o ia Hahi e haere ana ki nga kura, me te whakaaro tera e puta he page 25raruraru, he tika ano he maha nga hahi, otira ki taku whakaaro e whakaae ana nga mema katoa he mea nui rawa te korero i te Paipera. E whakaae ana nga matua katoa o nga tamariki he mea tika kia akona te mea tika ki nga tamariki kia ahei ai ratou te whiriwhiri i nga mea tika i nga mea he, kia mohio ai ki te mea pai ki te mea kino, ki taku whakaaro he mea nui rawa tenei. E mohio ana tatou mehemea e mahi ana tetahi tangata i tetahi mahi he (ara) e tango ana i te mea e hara i aia ake e whakawhiwhi ana te Ture i te whiri mona, e ako mai ana hoki te Karaipiture i a tatou he mea kino te mauahara tetahi ki tetahi me te tango i nga mea ehara nei i a tatou. Kei roto hoki i te Karaipiture nga whakaakoranga pai katoa mo tatou E whakaaro ana ahau me whakamana nga hiahia o te iwi a me whakamana te korero o te Paipera i roto i nga kura. He maha nga mema i pootitia mai ki tenei Whare i runga i ta ratou whakaae ka tautoko ratou i te korero Paipera i roto i nga kura. A mehemehea e whakamana ana nga mema i a ratou whakaaetanga ki te iwi nana raton i pooti mai ka tautoko ratou i tenei pire. Ka ki ake ano ahau he mea tika kia whakamatauria te korero Paipera, e hiahia ana ahau mehemea ka paahi tenei Ture kia korerotia ano te Paipera i roto i nga kura Maori pera ano me etahi atu kura. Kua mea mai etahi o nga tangata o toku takiwa kia tautoko au i tenei Pire. I korerotia ano tenei take e te Whare i te tau 1885. I whakahe au i taua wa, i puta mai te whakaaro ki au i reira mehemea ka korerotia te Paipera i roto i nga kura tera e puta tenei raruraru (ara) ko nga tamariki a nga katorika, a nga momana a etahi atu ranei hahi kahore nei e pai ki te korero i te Paipera tera e tu kau i waho i te wa e korerotia ana te Paipera e etahi ko te take tera i whakahe ai ahau ki te Pire i taua wa. no muri nei ka kite ahau ko te hiahia nui o te iwi kia whakaakona te Paipera i roto i nga kura no reira e mahara ana ahau he mea tika kia tautoko ahau i tenei Pire inaianei. E kore e taea e tatou te ki ehara te korero Paripera i roto i nga kura i te mea pai. E mohio ana tatou me oati marire te tangata i runga i te Paipera i mua ote tukunga o tetahi tangata kia korero i roto i te Kooti, no reira i mahara ai tatou he mea nui tenei, te marena hoki he mea tapu ki ta etahi whakaaro. Ki taku titiro ko te Paipera te kaupapa o a tatou mahi katoa, a ko te mea tuatahi hei ako ma tatou ko te wehi ki te atua, ko te wehi ki te mahi i nga mea kino. Ka mutu aku korero, erangi ka tautoko ahau i tenei Pire.

Hirini Taiwhanga.—E te Tumuaki

ki taku mohio ko te Paipera te kaupapa o Ingarangi a i hanga katoatia ana Tureki runga i te Paipera. No reira he mea nui rawa kia akona nga tamariki ki te Paipera, ki taku whakaaro kia kore te Paipera e kore e maha nga tau e tu ana a Ingarangi, i haere tetahi rangatira o Hamoa ki Ingarangi a ka haere ia kia kite i te Kuini me te patai atu kia te Kuini na te aha i nui ai a Ingarangi. Na ka mau te Kuini ki te Paipera ka mea na tenei i tae ai a Ingarangi ki tona rahi o naianei, i rongo ahau ki enei korero i Ingarangi, otira kahore ahau e mohio mehemea he tika he horihori ranei aua korero. No reira ahau ka ki me whai tatou i te tauira o Ingarangi no te mea ko te whenua tera o o tatou whaea, otira he Ture ano o Niu Tireni a me whai tatou i runga i aua Ture. Me makona katoa hoki nga tangata o Niu Tireni i runga i te maha o nga whakapono otira me rite rite tahi tatou, ko te take i tu ai ahau ki runga he tautoko i tenei Pire.