Paraire, te 25 o Nowema,1887.
Nga Hoko Whenua Maori O Te Waipounamu.

H. K. Taiaroa.—I au e tuku atu i te motini e man nei i toku ingoa, me whakamarama atu e au etahi tikanga.

Na me hoki aku korero ki te tau 1879, ki reira timata mai ai. Kei te mohio ano te Kaunihera i whakaturia tetahi Komihana hei whiriwhiri i nga hoko o nga Whenua Maori o te Waipounamu; engari kihai i ata oti te mahi a aua Komihana, natemea i whakamutua e te Kawanatanga i te wa e tu ana a Te Paraihe hei Minita Maori, Engari i puta ano te ripoata a nga Komihana mo ta raua i mahara ai he mea tika kia mahia. I muri mai i te putanga o taua ripoata i te tau 1882, i tukua mai he pitihana ki nga Whare e rua, a no te 30 Akuhata, 1882, ka whakataua te ripoata a te Komiti. E kore au e panui katou atu i taua ripoat engari ko te rarangi whakamutunga e penei ana:—

"E mea ana to koutou Komiti, ko to mea pai me te huarahi tika hei whakarite i te inoi a nga kai-pitihana, ma te Kawanatanga e tuku atu nga putake e inoitia mai na e nga kai-pitihana kia ata whiriwhiria e tetahi Kooti e whaimana ana tona tuunga, i runga ra i te mahara tika kia waiho ma taua kooti e tino whakatau pumau rawa atu, a ki te mea ka whakaritea ano etahi atu rahui e te Kawanatanga me whakaeke he here kia kore ai e taea te hoko."

I te tau 1884 i tukua mai ano tetahi pitihana e Tare Te Ihoka me Teone Topi Patuki me etahi atu Maori, he mea inoi kia whakamana te ripoata a nga Komihana. I mea te Komiti i reira me whakatu tetahi Komihana, a i runga i te mana o ana ripoata i whakaturia a Te Make hei Komihana. Na te Kawana i whakatu i te 29 Akuhata 1886, a no Aperira no Mei ranei kua pahure ake nei ka tukua mai te ripoata a te Make, koi ra te ripoata e hiahia nei au kia whakatakotoria ki te tepu o te whare nei.

Motinitia ana tenei motini, ara: "Kia whakatakotoria ki te tepu o te Kaunihera te ripoata a Te Make Komihana mo runga mo nga hoko whenua Maori o te Waipounamu."—(H. K. Taiaroa.)

Te Tiwini.—Kua ata whakaarohia e te Kawanatanga aua take, e mahara ake ana ratou he mea pai kia whakaaetia atu te tono a Taiaroa, mehemea ka whakaae mai hoki te Kaunihera ka koa te Kawanatanga ki te homai i te ripoata a Te Make ki runga ki te teepu takoto ai.

Wakaaetia ana te motini.

page 4