Taite, te 16 o Hurae, 1885.
Korero Paipera I Roto I Nga Kura.

Ihaka Hakuene.—E Te Tumuaki, e hiahia ana ahau ki te whai kupu mo te Pire e koerotia nei he whakama noku ko te korero a etahi mema o tenei Whare. He mea hoki tenei e pa nui ana ki nga Maori ara nga Kura Maori. Ahakoa kore e puta tenei pire me whakahaere tetahi tikanga ki toku takiwa kia ahei ai nga kaiwhakaako ki te panui te Paipera ki roto ki o matou nei kura. I te mea ano a Ngapuhi i enei wa kua hori ake nei me panui tonu te Paipera ki o ratou kura. E mohio ana matou kei kona te tino painga mo matou. Ko te puna tena o te ora. Kua whakarongo ahau ki te whai korero a Ta Hori Kerei, he pono tana korero mo te ahau o nga Maori i mua. E hara i te mea me whakawhetai ratou ki nga mema o tenei Whare mo to ratou noho pai o naianei. Kaore, engari na te rongo pai, na te Karaipiture i homai te ngakau pai, e hara i te Parameta. Na te Karaipiture i homai te humarie ki nga Maori. Titiro kaore kau he pitihana a nga Maori whakahe mo te Paipera kia kaua e panuitia ki roto ki nga kura. He nui ano a ratou page 14pitihana mo nga mate e pa ana kia ratou i runga i nga ture o tenei Whare. E kore ahau e korero mo etahi takiwa. Otiia e ki ana ahau ko toku iwi ko Ngapuhi e hiahia ana kia panuitia te Paipera ki roto ki nga kura. Ahakoa ki etahi mema he take iti tenei mea te karaipiture. E kore au e kii penei. Ka whakaatu ahau ki te he o tena kupu a ratou. Inahoki ko te Paipera te kaupapa a a tatou mahi katoa. Me matua kihi ite Paipera ka whakaponohia te korero a te tangata whaki korero, a me matua pera nga mema katahi ka whakaaetia te honore kia noho ratou i roto i tenei Whare. E whakama ana ahau mo nga korero whakakino i te Paipera. Ka rongo totatou Kuini tera ia e pouri mo enei tu korero. E kore an e kii kia roa rawa te panuitanga o te Paipera i roto i nga Kura, erangi me motuhake tetahi takiwa iti mo te pera. Ko nga tamariki katoa kei toku takiwa e whakaakona ana ki te Katihikima me te Paipera hoki. E hara i te Kawanatanga i whakamana i tenei ritenga i roto i o matou Kura, erangi na matou ake. E kotahi tonu ana nga Hahi katoa ki toku titiro, waihoki me te Paipera kotahi tonu. A ka tino tautoko ahau i te mema nana i homai tinei Pire.

Tame Parata.—I te mea kua roa haere tenei korero kua mahara ahau me whakapuaki kupu hoki ahau. Mehemea ka tukua te Paipera kia panuitia ki roto ki nga kura tera e raruraru nga Kaiwhakaako, tetahi mea tika kia ata whakaarohia he tini nga tamariki e tae ana mai ki o tatou kura he hahi ke o a ratou matua a he maha hoki nga hahi, i te mea he karakia ano ta ia hahi ta ia hahi me a ratou nei whakaritenga a ka kaha noatu aua hahi ki te whakaako i a ratou tamariki ki nga ritenga o te karaipiture. Mehemea e tino hiahia ana nga matua kia mohio a ratou tamariki ki nga ritenga o te Paipera ka taea e ratou te ako atu ki roto ki a ratou nei whare ko te wahi tika rawa tena hei whakaakoranga. Taku wehi tenei mehemea ka tukua te Paipera kia panuitia ki roto ki nga Kura tera e puta nga tamariki o tetahi hahi ki waho. E whakaakona ana te Paipera ki roto i te whare ki etahi tamariki e tu kau ana etahi kei waho i te wahi ua hau hoki tera e pa he mate ki aua tamariki, tetahi ka waiho tenei mea hei whakaiti i te haere mai o nga tamariki ki o tatou nei kura. Koinei aku take i whakaaro ai ahu me kaua te Paipera e panuitia ki roto ki nga Kura. Erangi me whakaako nga tamariki ki roto ki nga hahi ki nga Kura ra tapu i runga i ta o ratou matua i whakaaro ai, ka pooti ahau ki te turaki i tenei Pire.