Turei, te 7 o Hurae, 1885.
Hone Peeti Me Etahi Atu.

Ihaka Hakuene.—Ka patai ki te Kawanatanga mehemea kua oti ta ratou hurihuri kia whakamanaia te ripoata o te Komiti Tikanga Maori o te 5 o Noema, 1884, mo runga mo te pitihana a Hone Peeti ma, a mehemea kua oti te hurihuri ka pehea ra te mahi a te Kawanatanga mo taua take? E tino hiahia ana ia kia mohiotia te whakaaro a te Kawanatanga ta te mea kua maha nga tau e tupu ana tenei raruraru me te maha hoki o nga pakanga. I tetahi takiwa i mau rawa etahi Pakeha ki te toki hei patu i nga Maori, a na te pai tonu o nga Maori i ora ai nga tangata. Kei te mau tonu taua raruraru inaianei a kua koiero whakawehiwehi mai nga Pakeha ki nga Maori ki te mea ka arai ratou i nga Pakeha ka kawea ratou ki te wkareherehere. A e inoi ana ia kia tere te Kawanatanga ki te ata whakaaro i tenei mea.

Te Paranihi.—Tana whakahoki. Ko taua pitihana e eke ana ki runga ki nga tio o te takutai o Mangonui e tangohia noatia ana e nga Pakeha. Na nga Maori aua tio a he mea kua whakatapua aua taonga e te Tiriti o Waitangi ki nga Maori. I mea te Komiti Tikanga Maori ma te Kawanatanga e whakaaroaro tonu. Erangi no tera Paremete tenei kupu. Kua parea tenei mea e te Kawanatanga ki nga roia o te Karauna a kua kii mai ena he ritenga tenei no te ture. A mehemea e tika ana te, tangohanga o enei tio, ara mehemea e whai putake ana nga Pakeha ki te pera i raro i te ture, e he ana te arai a nga Maori a ka taea ratou te whiu ki runga ki te te ture ritenga. Otiia kua rongo te Kawanatanga tera te huarahi tika e tuwhera tonu ana ki nga Maori ara me kawe taua take ki te Kooti me tono he utu mo nga tio e tangohia ra. Kataki ka riro ma te tino Kooti Hupirimi e whakaoti. Kua mohio ia ka taea e nga Maori te kawe tenei mea ki te Kooti mo nga moni e £30, £40 ranei. Koia i mahara ai te Kawanatanga ko te mea pai me kawe e nga Maori tenei raruraru ki te Kooti, ko tona otinga marama tonu tena kaore he huarahi ke atu.

page 13