Other formats

    Adobe Portable Document Format file (facsimile images)   TEI XML file   ePub eBook file  

Connect

    mail icontwitter iconBlogspot iconrss icon

Nga Korero Paramete: 1881-1885

Paraire, te 7 o Akuhata, 1885

Paraire, te 7 o Akuhata, 1885.

Ture Wakatopu Ture Whenua Maori.

Wi Pere.—Ka whakapai ahau ki te kupu a te Minitia mo te taha Maori kia parea atu tenei Pire ki te Komiti mo nga tikanga Maori, nana ka kore e oti nga mahi nunui a taua Komiti taea te pewhea. Ko tenei Pire me te Pire Whakahaere Tuku Whenua Maori e tino pa nui ana ki nga Maori katoa o Niu Tireni tena ia ko nga mahi a to matou Komiti he titiro i nga pitihana a nga hapu me nga tangata takitahi. Na he mea nui rawa tenei pai noatu kia mahia tenei meaha te kore oti nga mahi iti. E kore e tika kia hoatu tenei Pire ki tetahi Komiti whiriwhiri engari te Komiti Maori ko reira puta ai aku kupu maha mo tenei Pire, ko reira puta ai aku kupu mo nga rarangi e he ana. E kore e tika kia amuamu matou nga Mema Maori mo te Pire katoa, kati ma matou ko te whakatikatika i etahi rarangi. Ko te tuakana o tenei Pire kua tae inaianei ki te Komiti Maori me whaihaere te taina.

Te Ao.—E tautoko ana ahau i te whaikorero a Wi Pere me te motini a te Minita kia kawea tenei Pire ki te Komiti Maori.

Tame Parata.—He kupu ruarua o aku e tino pai ana ahau kia mauria te Pire nei ki te Komiti Maori ahakoa he Pire pai ka taea te tino whakapai rawa. Kua tae mai he waea ki ahau he whakakaha i ahau kia hapai i tenei Pire ki roto ki te Komiti Maori.

Wi Pere.—Tenei taku kupu mo te page 27kupu o te mema mo Taranaki e korero nei mo te taimaha o nga mahi o ta matou Komiti. E whakahe ana ahau ki etahi o nga mema o taua Komiti mo ta ratou waihotanga ma matou anake te taumaha me te weraweratanga me ta ratou mahi haere noa mai ki te pooti matapo, kaore ratou e mohio ki nga take e mahia ana.

Panuitia tuaruatia ana te Pire.

H. K Taiaroa.

He tono na Taiaroa kia tukua atu ki aia he tauira no tetahi pitihana whakakino iaia, he mea tuku mai ki te Whare i te tau 1883.

Tame Parata.—E hiahia ana ahau ki te whakamarama i te tono a Taiaroa. E hiahia ana ahau kia whakaaetia taua tono ko te take i tino hiahia tia ai he maha no nga kowhetewhete me nga amuamu e tukua mai ana inaianei mo nga mahia a Taiaroa, ki taku whakaaro mehemea e tukua mai ana he kape o te pitihana ka ahei a Taiaroa te haere atu ki ana kaiwhakapae kia kite he kanohi he 'kanohi katahi pea ka taea e ratou te whakoti pai i aua mea ki te mea ka kore e tukua mai he kape o te pitihana tera e mau haere tonu taua mahi. I au e whakahaere pooti ana i te Waipounamu kia tu au hei mema ka haere au ki tetahi o nga wahi kua whakahuatia nei ara ki tetahi o nga wahi e hainatia nei tenei pitihana ka mea mai ratou ki au tera ano pea e pera to mahi me Taiaroa me he mea ka pootitia koe, koia nei te tikanga e kore ai ratou e pooti ki au, kahore au e wehi kei peratia mai nga whakape moku. E hara tera i te take i tono ai ahau kia homai te kape o te petihana kia Taiaroa. E tika ana no te whakahuatanga a Taiaroa i taua, mea ki te mema mo Waitaki, erange kihai taua mema i korero i te pitihana i tau wa, e hiahia ana ahau kia whakaaetia taua tono, kia ahei a Taiaroa te whakarite i tetahi tikanga tuturu ki taua iwi ki te kore e mahara ana ahau ka mau tonu aua raruraru.

Whakaaetia ana taua motini.