Ture Pane Kuini.

Wi Pere.—Ka patai ki te Pirimia me i kore ia e whakaae kia whakangawaritia te tikanga mo te utunga o te tiuti ara kia kaua e utua toputia engari me utu tau. Ko te tikanga e mau ana inaianei kia utua toputia he mea whakataimaha rawa tenei i nga Pakeha me nga Maori, e patu kino ana i nga tangata moni iti, tona putanga ko nga tangata whai-moni nui anake e kaha ana ki te hoko reti ranei i nga whenua. Kei te mate hoki nga Maori i te mea e whakaritea ana e tenei ture kia puta topu te tiuti, na reira ka whakaitia e nga Pakeha te moni e tukua ana ki nga Maori, e arai ana hoki i nga tangata moni iti kia kaua e reti i nga whenua Maori. Mehemea ka reti tetahi tangata i tetahi whenua Maori ka pau katoa tana moni i te utunga i te tiuti heoi haere ana ia ki te nama moni hei whakapai i taua whenua a pekerapu ana whakarerea ana e ia taua whenua muri iho ka riro he Pakeha ano, na ka utu tuarua te tiuti kore rawa he painga i takoto ki te Pakeha tuatahi i runga i taua rawakoretanga. Mehemea he Pakeha whaimoni erangi tena e kore ia e raru, ko nga Maori ke e mate i runga i taua whakaitinga i nga moni i a ia e utu topu ana i te tiuti. Ki toku whakaaro me tapa te ingoa o tenei Pire "He Ture hei Whakamate i nga Rawakore me nga Maori." Kaore ia i te whakahe ki te Pirimia e hara hoki i a ia tenei Pire otiia e vhakarereketia ana e ia, kati me whakatikatika. Tona tino hiahia me ata whakaaro te Pirimia kia kapea nga ritenga kino ki waho, kaua e waiho hei patu i nga rawakore me nga Maori. E tino piro ana tenei Pire ki nga puta ihu o nga tangata.

page 17

Te Taute.—E hara tenei Pire i te mea hou ka tekau ma rua tau, kahore te Kawanatanga e whakaae kia utua tautia te tiuti, he hoha ki te kohikohi me te ngaro hoki o etahi wahi o nga moni.

Wi Pere.—He pai noatu ki tana mahara kia utua tautia, e mohio ana ia e hara tenei i te Pire hou. Otiia ka taea noatia e to Pirimia mehemea e pai ana ia ki te whakamama i tenei Pire. Ki tona whakaaro ake ko Hatana te papa o tenei Pire.

Tame Parata.—Ahakoa ki te Pirimia he ture tawhito no te tau 1883 katahi ka whakataumahatia ona ritenga katahi ka ki me utu topu.