Title: Nga Korero Paramete: 1881-1885

Author: New Zealand Parliament, Legislative Council

Part of: He reo ture nō te taha Kāwana / Language of the Crown

Conditions of use

Share:

Teihana Reriwe Mo Waipawa Pa.

Wi Pere ka patai ki te Minita mo nga Mahi Nunui me i kore ia e whakaae kia whakaturia he teihana iti ki te reriwe i Waipawa Pa Nepia hei painga mo nga tini Maori me etehi atu tangata o taua takiwa e amio haere nei ratou ki te teihana kei tawiti noa atu to ratou nei kainga. Ka nui te haihai o nga Maori o Waipawa kia whakaritea he teihana mo ratou; te take he kainga nui rawa taua pa, he tokomaha ratou kei reira e noho ana he tangata noho tuturu, he whare papai o ratou he tangata ohu nui ratou ki te whakapai i ta ratou whenua tetahi ka nui nga Pakeha kei taua wahi hei painga mo ratou tahi te teihana e tonoa nei e ia. Tetahi take e tono nei ratou he awa nui kei waenga o to ratou kainga me te teihana nui, kei nga waipuketanga e kore ratou e whiti atu ki tera taha. Kei ko atu taua whenui tetahi teihana i hanga hei painga mo te Pakeha kotahi na ko te mea e tonoa nei e ia he mea iti noaiho kaore e pau nui nga moni o te Koroni.

Te Ritihana.—Tana whakahoki. He maha nga tononga mo tenei teihana mai ano i te tau 1882, otira na te mea e tino tutata ana tetahi teihana ki taua wahi e tonoa nei, e kore e tika kia puputu tona nga teihana, kaore, ia i mohio he awa kei waenga o te teihana me taua Pa. A ka whaikupu ia ki nga kai-whiu o te tereina me tu marine nga tereina i te taha o taua Pa ana puta nga waipuke.