Paraire, te 12 o Hepetema, 1884.
Urupa Ki Ohaeawai.

Ihaka Hakuene.—E tono ana ahau kia whakaae mai te Kawanatanga kia homai he moni kaua e nuku ake ite £50 hei taiepatanga mo te urupa kei Ohaeawai te wahi e takoto mai na nga tupapaku i mate i te whawhai a Heke. He kupu rua rua aku mo tenei mea kia mohio ai tenei Whare. Muri iho i nga whawhai kia Heke ka tanumia nga mea mate ki nga wahi takitahi, tae mai nei ki te tau 1872, te wa ko Ta Tanara Makarini te Minita Maori katahi ka whakaarohia he mea pai kia huihuia aua tupapaku ki te wahi kotahi. A ka hahua, ka tanumia kite wahi kotahi ki Ohaeawai hui atu hoki ki nga tupapaku Maori. Ka taiepatia te eka kotahi hei wahi tapu na nga Maori ano i mahi; na ka kohi moni ratou hei whakaora ite taiepa, hei whakapai i taua wahi, £7 taua moni. No te timata tanga o tenei tau, ka tahae tia taua moni e te tehi Maori, mau ana taua tangata kite whareherehere, e noho mai nei. Erangi i ngaro tonu te £7 iaia. Muri iho ka kohi ano nga Maori e £4. Kua mohio ahau e kore pea e rite te moni koia ahau e tono nei, me tapiri te Kawanatanga i ta matou i kohi ai. Kaua te Kawanatanga e maharahara mo tenei mea ka waiho hei tauira mo nga wahi tapu katoa. Me whakaaro ki tenei he nui nga Pakeha kei taua wahi; mehemea he Maori anake kaore ahau e tono.

Ka whakahoki kupu a Te Parana, te Minita Maori, ka mea. I era tau kua hori ake ka ahua rahi te moni a te Kawanatanga i pau i te mahinga i tetehi Whare me te Whare Karakia hoki me te mauranga mai o nga hoia i mate ra ki taua wahi kotahi tanu ai. E whakanui ana te Kawanatanga ki tenei putake, a ka whakahohorotia te mahi o te taiepa inaianei.