Other formats

    Adobe Portable Document Format file (facsimile images)   TEI XML file   ePub eBook file  

Connect

    mail icontwitter iconBlogspot iconrss icon

Nga Korero Paramete: 1881-1885

Taite te 28 o Hune, 1883. — Te Pire Mea Kia Akona Te — Karaipiture i Roto i Nga — Kura

Taite te 28 o Hune, 1883.
Te Pire Mea Kia Akona Te
Karaipiture i Roto i Nga
Kura.

H. M. Tawhai.—Ka whai kupu ano ahau mo runga i tenei mea ahakoa kaore ano ahau kia kite i nga korero o roto i te Pire. Kua rongo ano ahau i nga korero i mua atu ra mo runga i tenei mea, a, te take i hiahia ai ahau kia page 6korero i naianei kei eke mai enei tikanga ki runga ki nga Kura Maori. Tenei ahau ka whakamarama atu ki te Whare i oku whakaaro,—toko-iwa nga Kura kei te takiwa o Hokianga, e whitu nga kaiwhakaako he Mihinare, e rua nga Katorika; na ko tetahi o nga kaiwhakaako Mihinare i whakaturia e te Kawanatanga mo tetahi o nga Kura Romana Katorika, a i tona whakapuaretanga i te Kura ka tono ia kia tahuri ratou ki te inoi; whakahe ana te Komiti, ki atu ana ki a ia e rereke ana to ratou Haahi ki tona. I mua e pai ana ahau kia korerotia te Paipera i roto i nga kura, engari i runga i taku kite i te raruraru e pa ana ki taua mea katahi ka huri oku whakaaro. E hara i te Paipera te he; kei te pai noa atu tera Pukapuka; engari no te huhua o nga haahi i te ao nei o mua iho a tae mai ki naianei, i tipu mai i o koutou tipuna rano. I te oroko taenga mai o te whakapono ki tenei Motu e toru anake nga haahi, ko te Haahi o Ingarangi ko te Weteriana me te Romana Katorika. No te akonga i enei karakia ki nga Maori ka timata ratou ki te whawhai ki a ratou ano, ko te Paipera kaore i tutu mau tonu ano i tona ahua o mua—ko nga haahi anake i tutu. Ka karakia tetahi Minita i nga tangata e hara nei i tana hahi ka riri aua tangata, no reira ahau i mea ai inaianei e kore au e tautoko i tenei Pire, notemea ki te tautoko ahau i tenei Pire tera pea e riro hei whakararuraru i nga Maori. E pai ana au ki te menemana kua takoto nei ki te Whare, i ki hoki te Mema nana i tuku taua menemana, he whai nana kia oti raano te taha ki nga Romana Katorika, katahi ka korero ai i tenei Pire. Ko taku kupu tenei, ki te tino hiahia nga matua o nga tamariki kia akona o ratou tamariki ki nga karaipiture, tera ano nga kura e tukua atu ai ratou kia akona e nga Minita. Kaore ahau e pai kia riro ko nga kura o te Koroni hei whakaako i te whakapono ki nga tamariki, me waiho nga kura o te Koroni hei ako i nga tamariki ki nga tikanga me nga matauranga nunui, a me kaua e uru atu te whakapono ki roto whakararuraru ai. Ko etahi o nga kura Maori no te hahi o Ingarani, ko etahi no te Romana Katorika, na kei te noho pai noatu nga matua i te mea hoki kaore i te akona te paipera i roto i nga kura. Era au e tupato kei hui atu ano tenei mea hei whakanui i nga raruraru o te ao nei, ara te tuku atu kia korerotia te paipera ki roto ki nga kura o te Koroni, koia ahau ka ki e pai ana te menemana kua takoto nei.

I hinga tenei Pire i te pootitanga.