Taite, te3 o Hepetema, 1882.
Pire Muru Hara.

Meiha Te Wheoro.—He Pire tenei kua hiahia noa atu au kia tukua mai ki tenei Whare; kua tuku patai ano au i mua ake nei mo nga tangata e whai-tikangatia ana e tenei Pire. Ko toku hiahia ano tenei kia paahitia he Pire kia mana ai te Kawanatanga ki te muru i nga hara o nga tangata e kiia nei he tangata whai-hara. Ko nga takiwa i whawhai nei te Maori ki te pakeha kei te noho awangawanga tonu te ngakau Maori, kaore e tatu i nga kupu penei na taihoa ka tukua mai he Pire penei me tenei; engari kua tukua mai hoki tenei Pire i naianei katahi ka ora te ngakau Maori. E kore au e ki ko wai ma nga tangata hei mahinga ma tenei Pire, ka waiho e au tena ma te Kawana e whiriwhiri. Ko tenei hoki te take o taku patai i mua tata ake nei he ui atu naku mehemea ranei ka tukua mai e te Kawanatanga he Pire Muru Hara. Ahakoa tere te mahi i tenei Pire, roa ranei, kua mutu te ohooho o te ngakau Maori i te mea kua paahi te Pire. Kua maha aku nei tono ki era Kawanatanga engari katahi ano tenei Pire ka tukua mai. Ka koa rawa au ki te tautoko i tenei Pire.