Turei, te29 o Akuhata, 1882.
Turei, te29 o Akuhata, 1882.
Nga PitihanaA H. Patawhira,
W. Waitangi Me Etahi Atu.

Meiha Te Wheoro.—He patai taku ki te Kawanatanga mehemea kua whakamanaia e ratou nga whakahau i roto i nga ripoata a te Komiti mo nga Mea Maori mo runga i te pitihana a H. Patawhira o te tau 1879 me te pitihana a Wiremu page 61Waitangi me etahi atu i te tau 1880? I whakaaetia e te Komiti te pitihana a H. Patawhira ma, he tono Karauna Karaati mo etahi whenua i Waikato engari kaore ano kia whakahaerea e te Kawanatanga te kupu a te Komiti. Na mo runga i te pitihana a W. Waitangi ma, he hunga tera kua roa e noho ano i runga i o ratou whenua e noho mai nei, no mua atu ta ratou noho i te paahitanga o te Pire mo nga whenua rau-patu o Waikato. I pai ano te whakatau a te Komiti mo taua pitihana engari kaore ano kia mahia e te Kawanatanga.

Te Paraihe.—Ko te patai tuatahi e pa ana ki etahi whenua i Waikato i kiia kia whakahokia ki nga iwi-hauhau. Ko nga Karaati mo era wahi e meatia ana kia whakaputaina ki ia tangata taki-tahi erangi ko etahi Karaati na nga Maori ano i tono kia taki-rua ki roto ki te mea kotahi. Ko etahi o aua Karaati kua whakaputaina, ko etahi kei te hangaia i naianei. Na mo te pitihana tua-rua e pataitia mai nei e rereke ana tena. He mea ke tena mo raro i te Ture mo nga Whenua Raupatu o Waikato. Kua oti ano i au te whakahoki i mua ake nei tetahi patai pena me tena. Otira i muri tata i tenei Paremete tera au e tahuri ki te mahi nui i taua Ture.