Mane, te 14 o Akuhata, 1882.
Pire Mo Te Tanumanga o Te
Moana i Pipitea, Poneke.

H. M. Tawhai.—E te Tumuaki e kite iho ana au e ahua pukuriri ana nga mema, maku pea e whakakakata. E rite ana tenei pire ki te pire i pahitia i tera tau, na ko nga mema hou anake kei te arai i naianei. Engari e kite ana au i tetahi rarangi hou i roto i tenei pire, e mea nei kia tanumia tetahi taha o te moana, na e tino aroha ana au ki nga ika ka aruarumia atu nei i reira. Ka tanumia atu hoki nga kai a nga ika ki raro ki aua paru. Ka hoki au i naianei ki te takiwa o mua ki te takiwa i ora ai o matou matua. Kua ngaro noatu pea te wahi i noho ai ratou ki te tekau putu ki raro. I te hokonga a nga Maori i nga whenua ki te Pakeha, ko runga anake i ruritia, kaore i hou ki raro o te whenua ruri ai, mehemea i pera kua mohiotia te hohonu o te whenua i hokona e ratou. I runga i te Tiriti o Waitangi e mea ana kia waiho tonu ki nga Maori a ratou taonga, ahakoa i runga i te whenua i raro ranei i te whenua, ko runga anake o te whenua i hokona e nga Pakeha. Heoti ano taku kupu i naianei ka tautoko au i tenei Pire natemea e rite tonu ana ki te pire i pahitia i tera tau. E hiahia ana au kia pahi tenei pire i naianei, me mutu te korero

page 51