Other formats

    Adobe Portable Document Format file (facsimile images)   TEI XML file   ePub eBook file  

Connect

    mail icontwitter iconBlogspot iconrss icon

Nga Korero Paramete: 1881-1885

Nga Moni I Utua Ki Nga — Mema

Nga Moni I Utua Ki Nga
Mema.

H. K. Taiaroa.—He motini taku e mau na i taku ingoa; ko te take i takoto ai taku motini ki runga ki te Ota Pepa, na tetahi mema hoki i motini kia whakatakotoria ki runga ki te tepu o te Whare nei nga moni katoa i utua ki au i te takiwa e tu ana au hei mema, me nga moni hoki i pau i runga i aku haere mai ki tenei Whare me oku hokinga atu ki te kainga. Ki taku whakaaro he mea he te whakaatu ko nga moni anake i pau i au, te whakaaturia e taua motini nga moni a nga mema katoa penei me aku; kaore hoki au e pai kia kite te koroni katoa ko au anake te mea kai ana i nga moni o te motu nei. Heoi ano taku he tono atu i runga i te whakaaro tika kia whakatakotoria ki te aroaro o tenei Whare nga pukapuka whakaatu i nga moni kua pau i nga mema katoa. Tetahi mea i roto i nga pukapuka i tukua mai nei hei whakaatu i nga moni i pau i au, e noho ana e £28, ko tera moni i utua mai e te Kawanatanga ki au mo te rironga o taku whenua i a ratou hei wahi pupuhitanga ma ratou; kaore au i te mohio e hia ranei nga tau i a ratou—tera pea kotahi te kau. Wahi iti atu kua tahuri ratou ki te kimi i aku mea ake e pa ana ki toku tinana, a ka kawe mai ki roto ki te Whare nei takoto ai. Heoi koia tenei te take i tuku ai au i tenei motini:—Motini, ara: "Kia whakatakotoria he pukapuka ki te aroaro o tenei Whare whakaatu i nga moni katoa kua utua ki nga Mema o te Paremete timata mai i te tau 1872 tae mai ki te tuanga o te Paremete o te tau kua hori ake nei; me uru hoki ki roto nga moni utu ki nga Mema, nga moni e pau ana i runga i ta ratou mahi, me nga moni a te katoa e kainga ana e ratou i runga i nga mahi pewhea, aha atu ranei e mahia ana e ratou."—(H. K. Taiaroa.)

Na nga mema i roto i te Whare i inoi atu kia Taiaroa kia unuhia tona motini, na ki ana ia e pai ana i te mea kua whakapuakina e ia ona mahara mo runga i taua mea.

Unuhia ana te motini.