H. Tomoana, E patai ana au ki te Minita mo te taha Maori, he pehea te whakaaro a te Kawanatanga mo te reta a te Penetana Tumuaki o nga Kai-whakawa mo Omarunui, i tuhia i te 13 o Oketopa, 1881; mehemea ranei ka whakahaerea e ratou i runga i te tohutohu a te Penetana? Me panui atu e au taua reta, e penei ana:—

E Pa,—I au e tuku atu nei i nga kape o nga kupu i tuhia i te whakawakanga mo Omarunui, me ki atu ano au e kore e taea e au te pehi i taku whakaaro i pohehe te mahi a te Kooti.

"I uru tahi nga tekihana e rua (A me B) ki roto ki te ota o te Kooti, engari kaore i whaimana ki te whakaaru i te tekihana B (te mea iti), kei waho ke tera o te kereme.

"Ki taku mahara ka taea te whakakore i taua karaati i runga i te tikanga o te Ture.

"Ka tukua tahitia atu e au te mapi.

Heoi ra Naku, Na,

Te Paraihe.—He tikanga pakeke rawa kei roto i te patai a te Mema na. Kei te mohio au i tae mai ano taua mea ki etahi komiti o te Whare, i whakaatu ano au i era rangi ki te Mema na i etahi huarahi e taea ai e ia te tuku kia whiriwhiri ano taua mea; engari kaore te Mema na i haere i runga i taku tohutohu atu. Na mo runga i te mahinga a te Ture mo runga i taua mea, tera pea i pohehe te mahinga. Ka whakahokia tetahi patai pena ano i tera Whare e tetahi tangata mohio ke i au. Me tono atu e au ki te Mema na kia waiho tana patai mo te wiki kotahi, kia watea ai te Kawanatanga ki te whiriwhiri i taua mahi. Kei reira pea te taea ai e au te whakahoki tuturu atu i tana patai.