.gif)
Nga Korero Paramete: 1881-1885
Te Pitihana A Horomoa Pa — Atu Ma
Te Pitihana A Horomoa Pa
Atu Ma.
H. K. Taiaroa.—E tautoko ana au i te
menemana. Ka hiahia nga Mema Maori kia karangatia he kai-korero ki
te komiti, ka ki mai te tiamana e kore e taea e ia i te nui o te
moni e pan. E hara i te mea ko tenei anake te komiti e karanga page 40
ana i nga kai-korero
mo nga pitihana penei, na ki taku whakaaro he mea tika kia tukua mai
aua tangata hei tautoko i nga putake o aua pitihana.
H. M. Tawhai.—E te Tumuarki, katahi ano au ka mohio ki te tupato o te tiamana o te komiti ki te tiaki i nga moni o te koroni kei pau i te maunga mai i nga kai-korero ki te komiti. Ko te mahi a taua tiamana i te mea he pitihana tikanga nui kei te whiriwhiria e te komiti e whakahengia ana e ia, ka korero roa ia kia tae mai ai etahi o tona taha ki te komiti. Koia tana mahi i tera taua; kei tenei tau kua ki mai ia he nui no te moni e pau. He mea tika kia pau nga moni i runga i te whiriwhiringa i nga tautohe o waenganui o nga iwi e rua. E hara i te mea e pau ana te moni i te kawenga mai i nga kaikorero, engari e pau ana ano i nga tiamana o nga komiti, e utua nei ki te £100, tae atu etahi ki te £600 i te tau. I ki mai hoki taua Mema, he kore tae atu no nga Mema Pakeha, Ha! E hara ranei i te Kawanatanga nana i whakarite aua Mema e ngaro nei. Me te tiamana ano hoki na te Kawanatanga ia i whakatu. I mahara tonu au e mana noatu ana te komiti ki te karanga i nga kai-korero mo nga pitihana e whiriwhiria ana e ratou. No te tononga a te Mema mo Warahi kia karangatia nga kai-korero, ka tahi ia ka ki he nui rawa no te moni e pau. He mea pea nana he Maori aua kai-korero, i kore ai ia e pai kia utua aua moni, mehemea he Pakeha aua kai-korero kua kore pea ia e whakahe i te paunga o aua moni. Na mo runga i tetahi pitihana e korerotia ana i naianei e te komiti mo nga mea Maori, e hiahia ana ratou kia karangatia tetahi komihana hei whaaki korero mo runga i te ripoata mo te Waipounamu, kihai hoki te tiamana i pai kia karangatia. E korero atu ana au i enei kupu i naianei kia mohiotia ai te ahua o te tiamana o to matou komiti. Ki taku mohio he rereke noatu tenei tiamana i etahi atu tiamana o nga komiti. Ko tana tu ahua mehemea nei kei a ia anake te mana, kaore ia i te mahara he Mema a no matou no taua komiti.