Teihana O Te Reriwe I Akarana Ki Kaipara.

H. M. Tawhai.—E patai ana au ki te Kawanatanga, mehemea ka whakaritea te tono a nga rangatira o te Taou hapu o Ngatiwhatua, mo nga teihana reriwe e tu nei i runga i o ratou whenua, ara nga teihana i, Reweti, i Waimauku, me Woodville i runga i te raina reriwe o Akarana ki Kaipara? I ki mai ano nga tangata no ratou aua whenua, kua maha a ratou tono ki te Kawanatanga kia whakina mai e te Kawanatanga mehemea ranei ka utua page 36ratou mo te putanga o te rerewe i runga i to ratou whenua, a kaore ano kia whaikupu mai te Kawanatanga mo runga i taua tono a nga Maori. No reira i mea mai ai ratou kia tukua e au ki te Ota pepa, kia mau ai te kupu whakahoki mai a te Kawanatanga. No reira i patai atu ai au i tenei mea ki te Kawanatanga.

Te Honehana.—Tana kupu whakahoki. Ko taua reriwe e korerotia na kei runga i te raina reriwe i waenganui o Riverhead me Kaipara, ko tenei raina reriwe he mea i timataria i te takiwa o nga Ture Porowini, no muri ka riro ma te Kawanatanga o te Koroni e whakaoti. Ko te Ture Porowini i whakamana ra i taua mahi, i mea me whakaae atu raano te whenua mo taua raina reriwe, katahi ka timata te mahi. No te tau 1871 ka hainatia nga pukapuka e rua, tuku atu i te Whenua, i hainatia e nga Maori me nga Pakeha i whaitake ki runga ki taua whenua, i pa ranei i runga i te tikanga mokete. Ko te pukapuka a nga Maori i hainatia e nga Maori i tae ki te 169, a i tuhia ano e te Rokena, Kai-whakawa, tana kupu whakaatu i te hainatanga o nga ingoa o nga Maori katoa i whaitake ki te whenua i hoatu ki te Kawanatanga, kia mahia ai taua raina reriwe. I raro i enei tikanga e kore e tika te tono kia utua te whenua i hoatu peratia i reira.