.gif)
Nga Korero Paramete: 1881-1885
Wenerei, te 22 o Hune, 1881
Wenerei, te 22 o Hune, 1881.
Ripota A Nga Komihana Mo Nga Hoko Whenua I Te Waipounamu.
H. K. Taiaroa.—Patai ki te Kawanatanga. Kua taemai ranei te ripota a nga Komihana mo nga hoko whenua o te Waipounamu; a mehemea kua tae mai, awhea ka tukua mai te whakamaoritanga ki te whare?
Te Roretana.—Kupu whakahoki. Kua tae mai ki te Kawanatanga te ripota a aua Komihana. Kua tukua atu ki te perehi a kei te taia mai, kia oti ka tukua ki te tepu o te Whare. Kei reira ka whakamaoritia i raro i nga ture o te Whare.
Okaoka Tangata Mo Te Mate Koroputaputa.
H. M. Tawhai.—Patai ki te Minita mo te taha Maori. Mehemea ka pai ia ki te whakahau i nga rangatira o nga tari Kawanatanga i nga takiwa o raro o Akarana, kia mahia e ratou nga Maori o taua takiwa kei pangia e te mate koroputaputa? Te take i pataia ai tenei, he mea kia araia atu te mate kino i Poihakena, kei pangia nga Maori e taua mate. Kaore he Rata o taku takiwa, no reira i pataia atu ai e au.
Te Roretana tana kupu whakahoki. Kei te tu nga tangata mahi i tau mea i nga takiwa katoa o te Koroni. Kaore au e mohio ana mehemea ranei e tae atu ana ki nga Maori katoa, otira maku e ata patai, ma te Kawanatanga e whakarite he tikanga e puta atu ai nga kai-mahi okaoka hei arai mo taua mate, kia taea ai hoki e nga Maori.