Meiha Te Wheoro.—Patai ki te Kawanatanga, mehemea ka mahia e ratou he tikanga hei whakahaere i nga utu ki page 2nga Pakeha me nga Maori mo a ratou taonga i ngaro i roto i nga whawhai? Ko tenei patai e whai ana i te Pire i kiia ra ka tukua mai ki te Whare, mo nga tono a nga Pononga a te Kuini kia utua o ratou taonga i ngaro nei i roto i nga whawhai. E hiahia ana nga Maori me nga Pakeha kia mahia ki te Pire.

Te Hooro tana kupu whakahoki.— Kaore te Kawanatanga i te whakaaro kia tukua he Pire pena ki te Whare.

Urupa I Taupiri.

Meiha Te Wheoro.—Patai ki te Kawanatanga, mehemea ka taiapatia e ratou te Urupa i Taupiri, pera me te mea i whakataua e te Komiti mo nga mea Maori i runga i taku Pitihana i te tau 1876? I tera tau i ki mai te Minita mo nga Mahi Nunui, ka taiapatia taua wahi. Kua kite ahau i tetahi taiapa i reira, kotahi pea tiini te roa, hawhe tiini te whanui, i mahue atu te nuinga o te urupa ki waho o taua taiapa. Kei te takoto kau nga tupapaku kua hahuatia i te mahinga i te huarahi.

Te Roretana tana kupu whakahoki. Ka mahia e te Kawanatanga taua taiapa, pera ano me ta ratou kupu whakaae i te tuatahi. Katahi ano au ka tonoa kia titiro ki taua men. I runga i aku patai mo runga i tera ka mohio au kua mahia tetahi taha o taua taiapa, engari na te kuare ki nga rohe o te urupa i kore ai e rite ki te tono a Meiha Te Wheoro. Otira mehemea ka pai a Te Wheoro ki te haere mai kia kite i a au, ki te tohutohu mai, ka mahia e au taua taiapa pera me tana e hiahia ana.

Pou Kara I Maiki.

H. M. Tawhai, Patai ki te Kawanatanga; Mehemea e mohio ana ratou kei te noho mangere nga kai-tiaki o te Kara i Maiki, Ratara, kaore hoki i te whakairi kara mo nga kaipuke e haere ana ki roto i te awa? Nga ingoa o aua tangata ko Tame Hau me Wiremu Wiremu. Na nga Maori i whakatu taua pou, tonoaana kia Te Makarini kia homai he kara, hei whakairi me ka rere mai he kaipuke. Whakaaetia ana e Te Makarini taua tono, whakaturia ana te pou. No naianei ka mangere nga kai-tiaki, kaore hoki e whakairi kara e ka rere mai nga kaipuke.

Te Akitini, Tana kupu whakahoki: —E pouri ana au i taku rongonga atu ki nga kupu a te Mena kua korero mai nei i te mangere o nga kai-tiaki o te pou kara. Kua puta aku kupu whakahau kia pai te tiaki me te whakahaere; me te ki atu hoki kia whakairia te kara i nga ra whakangahau katoa.