Taite, te 15 o Hepetema, 1881.
Pire Whakamana I Nga Komiti Maori.

H. Tomoana.—Ka motini au kia korero tuaruatia tenei Pire. He mea tenei e hiahiatia ana e nga Maori katoa o te Koroni. I era Kawanatanga i tu i mua ra ko te mahi a nga Maori he tuku pitihana mai kia whakaturia he ture penei. I whakaaro hoki nga Maori kei te Kawanatanga te mana o nga mea katoa o te Koroni—te whenua, me etahi mea katoa—na ko te mea pai me tono atu ki te Kawanatanga kia tukua tetahi mana ki te maori kia whakahaere ai ano te Maori i a ratou nei mahi i roto ano i o ratou takiwa. E mohio ana te Maori mehemea e tukua page 32atu ana he mana penei ki a ratou era tonu e tau he pai ki te katoa i runga i ta ratou whakahaere. I nga tau katoa te mahi a nga Maori he pitihana kia whakaturia he ture penei kia kaha ai ratou ki te whakahaere i nga tikanga o o ratou takiwa. Kua pau katoa nga rarangi o te Ota Pepa te haere e taku Pire, a raro, a waenganui, a hoki atu ano ki raro; Katahi ano ka puea ake i tenei po; heoi e kore au e arai i te hiahia o nga mema e pirangi nei ki te hoki ki o ratou kainga, e kore au e whakaroa i te taima o te Whare ki te korero i tenei Pire; ka mutu taku me korero tuarua tenei Pire a ka waiho hei upoko mo nga mahi o te ra tuatahi e hui mai ai tera Paremete.