Other formats

    Adobe Portable Document Format file (facsimile images)   TEI XML file   ePub eBook file  

Connect

    mail icontwitter iconBlogspot iconrss icon

Nga Korero Paramete: 1881-1885

Wenerei, te 7 o Hepetema, 1881. — Taunga Kaipuke I Taranaki

Wenerei, te 7 o Hepetema, 1881.
Taunga Kaipuke I Taranaki.

H. M. Tawhai, ka whaikupu au mo runga i te hiahia a taku hoa a te mema mo Taranaki. E ki ana etahi o nga mema me mutu taua mahi. Na me ata patai atu e au, e tae ana ranei nga tima me nga kaipuke ki Nagmotu? A ka mahia ranei tenei waapu ki te tihi o Taranaki maunga? Mehemea e hiahiatia ana kia mahia ki runga ki te tihi o Taranaki maunga, katahi ka tika te ki kia kaua e mahia. E mohio ana au he maha noa atu nga tima me nga kaipuke e tae atu ana ki Ngamotu, a kaore he taunga i reira. Ki taku whakaaro ko nga mema e ki nei kia kaua e mahia he taunga kaipuke, e hiahia ana kia tahuri nga kaipuke ki te moana kia mate ai nga tangata e haere mai ana i tawhiti. E ahua rite ana ano tenei ki te pakarutanga ote "Tararua" tima. Kua maha nga tau e tono ana nga kapene o nga kaipuke kia whakaturia he raiti ki taua wahi, a no te pakarutanga ra ano o taua tima me te matenga o te tini pakeha, katahi ka whakaturia he raiti ki reira e te Kawanatanga. Na te pakeke o te Kawanatanga ki te kaiponu i runga i aua tono i pakaru atu ai te "Tararua." Ka penei ano i tenei. E hiahia ana nga mema kia whakarerea taua mahi, a kei apopo, kei tetahi atu rangi ranei ka tahuri pea he kaipuke ki reira, a mate atu pea he tangata, katahi ka puta te hiahia kia mahia he taunga kaipuke ki reira E aroha atu ana au ki nga mema o Taranaki, natemea e whakaaro ana au he mea tika kia tiakina nga tangata e haere atu ana ma runga kaipuke ki Ngamotu. Heoti aku kupu, he whakaatu kau naku, e tautoko ana au i te tono a nga mema o Taranaki.