Paraire, te 17 o Hune, 1881.
Pire Raihana Waipiro.

Meiha Te Wheoro.—E te Tumuaki, e hiahia ana au ki te whaikorero mo tenei Pire, na te mea e pa ana etahi o nga rarangi ki nga iwi e rua. E kai ana nga tane me na wahine me nga tamariki o to matou iwi i tenei mea i te waipiro. Ki taku mohio e kore e rite te kai a te Pakeha, ki ta te Maori kai i te waipiro. E kitea ana te Maori e takoto ana i roto i te paru, kaore i te mahara he tangata, kaore hoki he whakaaro mo te whare hei takotoranga mo ratou. Ka hari ahau mehemea ka taea e tenei Whare te tutaki i nga hoko waipiro i aua wahi, ka tautoko au i tera mehemea ka motinitia peratia. Rereke te tuku wipiro a nga tangata i nga hotera ki nga Maori me nga Pakeha. Ko te waipiro e hokona ana e ratou ki nga Maori e rite ana ki te purutone, ki te tupeka, me te pepa, a ko nga waipiro pai ma nga Pakeha anake. Ka mutu te kai a nga Maori i aua tu waipiro kino nei, ka pangia ratou e te mate, ki te mate rewharewha, me te mate manawa rua, a mate noa ratou, kaore e ora ana. Kaore nga Pirihimana o nga takiwa Maori e tiaki e titiro ranei i nga waipiro e hokona ana ki nga Maori, no reira i hiahia ai ahau kia ata mahia he tikanga e te Whare nei. Ki taku whawhaaro tera pea e pai me whakatu he Pirihimana Maori hei titiro i nga waipiro; a ki te kitea e ia he waipiro purutone pepa i roto i nga hotera me whaina rawa taua tangata. Engari ko taku tino hiahia me kore rawa he waipiro ki nga takiwa Maori. I te mea e komititia ana te Pire nei, ka komotia atu e au he menemana hei tiaki i nga Maori i nga takiwa e tu nei nga paparakauta.