Wenerei, te 27 o Harae, 1881.
Korero Pokanoa. Whakahe I Nga Mahi O Te Whare.

H. K. Taiaroa.—I mua i te korerotanga o nga ota o te ra, e hiahia ana au ki te whaikupu mo runga i tetahi korero pokanoa mo te Whare nei. Ara mo etahi kupu i roto i tetahi nupepa ko te Niu Tireni Taima te ingoa, i taia i te Rahoroi, te 23 o nga ra o tenei marama, e penei ana:—

"Kua penei te whakahoki a te Komiti o te Paremete. Mo runga i nga mea Maori kaore e whakaaetia te tono kia tukua houtia nga riihi mo nga Rahui Maori i Mawhera e riihitia nei e nga pakeha. Ko te nuinga o taua taone kei runga i nga whenua Maori e tu ana, kei te hiahia nga pakeha kia whakahoutia nga riihi kia ahua tuturu ai to ratou noho."

Kaore au i te mohio i penei te tikanga o te mea i tukua atu ki te Komiti mo nga mea Maori. E he ana nga tangata o te Komiti e whakapuaki nei i nga mahi a te Komiti i te mea hoki, kaore ano kia tae mai te ripota a te Komiti ki te Whare. Kahore rawa he kupu o roto o te pitihana a Ihaia Tainui e tono ana kia kaua e whakahoutia nga riihi, he tito rawa te kupu i te nupepa nei. I tono te pitihana a Ihaia Tainui, ratou me etahi atu kia ruritia kia wehewehea aua rahui. Kei te pai nga Maori kia retia houtia o ratou whenua mo nga tau roa noatu, engari ko nga mahi a page 14te Kawanatanga kei te whakararuraru. Kaore e tika kia pokanoa nga nupepa ki te korero i nga mahi a nga Komiti i te mea kaore ano kia tukua mai ta ratou ripota ki te Whare.

Te Tumuaki.—Ka taea e koe te tono kia kawea mai ki konei te kai-tuhituhi o taua nupepa kia whakawakia, kia kiia mai e ia na wai i whakaatu ki a ia nga mahi o te Komiti.

H. K. Taiaroa.—E kore au e kaha ki te ki atu, engari ma te Whare e whakahau. He mea ke taku kia rongo te Whare, hei whakatupato hoki i taua tangata kia kaua ia e mahi penei a muri ake nei.