Taite, te 16 o Hune, 1881.
Mo Nga Hohipera Me Nga Rawakore.

H. M. Tawhai—E hiahia ana au ki te whaikupu mo runga i te Pire Hohipera me te awhina i nga Rawakore. He maha noatu nga pakeha penei o te takiwa ki te pito ki raro o Akarana. He maha noatu nga turoro kaore nei e tae atu ki nga hohipera. Ki taku titiro kahore i mahia tenei Pire mo nga tangata i nga takiwa o waho, engari i mahia ketia mo nga turoro me nga rawakore o nga taone. Kaore he oranga i roto i tenei Pire mo nga tangata e mate ana i nga takiwa o waho, me pehea hoki tona haere atu ki te hohipera, he matara rawa atu hoki. Engari me whakatu he hohipera ki nga takiwa o waho kia ahei ai te tae atu. He maha nga tangata i mate, kaore nei i tae atu ki te hohipera kia mahia o ratou mate. Ki taku whakaaro i mahia tenei Pire mo nga taone rahi penei me Akarana, me Poneke me etahi atu, a kaore i mahia hei painga mo nga takiwa o uta. Mehemea i whakaritea e te Kawanatanga kia whakaturia he hohipera ki nga takiwa o waho—ara, i nga takiwa e tawhiti ana i nga taone—katahi au ka tino tautoko ia ratou. E kore au e korero roa mo tenei Pire. E rite tonu ana hoki ki nga mea i mahia i roto i nga tau kua pahemo ake nei, i mahia mo nga iwi e noho ana i roto i nga taone. Kia Komititia te Pire nei, kei reira pooti ai au ki aku e pai ai.