Teihana O Puketeraki.

Tame Parata (mema mo nga Maori o Te Waipounamu).—Ka patai ahau ki te Minita mo nga Reriwe, Mehemea ka tahuri ranei ia ki te hanga i tetahi tikanga pai ke atu mo nga utanga me nga takai me nga paihere e takuna atu ana a e waihotia ana e nga tereina ki te teihana i Puketeraki, i te mea he maha noa iho nga mea e ngaro ana, e tahaetia ana, e kore atu ana i taua teihana i raro i nga ahuatanga e mana nei i naianei, a heoi kau te whakautu a te Tari Reriwe ina tukua atu he kereme ki a ratou mo aua mea, ko tenei: "He Paraki-teihana a Puketeraki, no reira kaore te Tari Reriwe e kaha ki te whakaae kia whai raru ia mo nga taonga e waihotia ana i reira"?

Honore Ta J. G. Te Waari (the Hon. Sir J. G. Ward), (Minita mo nga Reriwe).—Ko nga taonga e hariharia ana a e waihotia ana ki Puketeraki he korekore rawa, a ko te wahi kua oti te whakarite hei takotoranga mo aua taonga i taua teihana e nui noa atu ana mo ia ahua katoa. E waiho atu ana nga taonga me nga takai ki nga paraki-teihana i runga i tenei tikanga na, ki te ngaro, me tau page 22taua aitua ki runga anake ki te tangata i tukuna ai ki a ia aua mea. Otira he ruarua Tawa nga kupu whakahe e tae mai ana ki te Tari Reriwe mo nga taonga e ngarongaro ana i nga paraki-teihana. Mehemea ka whakaaetia tena tikanga e tonoa mai nei—ara, me rite tonu te tau he whai-rarutanga ki runga ki a ia i nga Paraki-teihana pera ano me nga teihana whai apiha—heoi kua katikatia katoatia te nuinga o nga Paraki-teihana puta noa i te koroni i te itiiti rawa o nga mahi e mahia ana i aua teihana. A mehemea ka pena, ka roa rawa te whenua hei haerenga mo nga tangata e noho ana i nga takiwa tokoiti nei te tangata e tae atu ai ratou ki nga teihana whai apiha. He nui te taima e pau, a he nui te raru e puta mehemea ka penatia; nui ke noa atu i te raru o te ngaromanga o nga mea takitahi nei e ngaro atu ana i nga Paraki-teihana i naianei i raro i nga tikanga e mana nei. Otira e mohio ana te Tari Reriwe ko etahi o nga kupu whakahe e whakapuakina ana mo te ngaromanga taonga i nga Parakiteihana he whakanui noa iho i te korero mo te mea hanga noa iho; a mehemea ka tino uiuia ka kitea he kore rawa nga mea e pono ana. Heoi, e kore ahau e kaha i tenei wa ki te whakarereke i nga tikanga e mana nei i naianei.