Nga Ture Whenua Maori.

Te Raiti Honore Te Hetana (the Right Hon. Mr. Seddon), (Pirimia).—Kua tae mai ki ahau tetahi reta na nga mema Maori tokotoru, na Hone Heke, na Wi Pere, me Tame Parata, mo runga mo te whakanohonohoanga o nga whenua Maori. He take nui taua take, a ka nui ano hoki te marama o te takoto o nga kupu o taua reta, a tena e tau hei maramatanga mo nga honore mema. E tono atu ana ahau kia whakaaetia kia whakatakotoria e au taua reta ki runga ki te teepu.

Te Herihi (Mr. Herries), (mema mo Pei o Pereti).—Kaore ahau i te mohio e tika ana ranei kia whakatakotoria ki runga ki te teepu tetahi reta e whakaatu ana i nga whakaaro o etahi o nga mema o tenei Whare, notemea ko ena whakaaro hoki ka taea noatia atu te whakaatu i runga i te whai korero i roto i te Whare, a mehemea ka whakaaetia tenei, e hiahia ana ahau kia mohio ka whakaaetia ranei tena tikanga ki era atu honore mema kia pera hoki ta ratou whakaatu i o ratou nei whakaaro ki te Whare nei. Mehemea ka whakaaetia tenei reta kua kore he huarahi e tu ai aua mema ki te whakapuaki i o ratou mahara mo runga i tenei take, engari me ata whai-korero marire katahi ka tika, ka ahei hoki etahi atu mema ki te tu ki te whakautu. Ki taku titiro he tikanga rereke rawa tenei, a e tono atu ana ahau kia whakataua mai e te Pika mehemea e tika ana kia penatia.

Te Raiti Honore Te Hetana (the Right Hon. Mr. Seddon), (Pirimia).—Kaore aku hiahia ki te tohe i tenei take. I tuhia mai ki ahau te reta nei, a he tino take nui tenei take; engari i mahara ahau page 38he mea pai pea kia whakatakotoria atu e au enei maramatanga e mau nei i roto i tenei reta ki te aroaro o nga mema o te Whare.

Te Herihi (Mr. Herries).—E tumanako atu ana ahau me whakatakoto and hoki e te honore mema ki te aroaro o te Paremete aku reta e tuhi atu ana ki a ia mo runga mo etahi take nunui e pa ana ki te katoa.

Te Raiti Honore Te Hetana (the Right Hon. Mr. Seddon).—Kei te ahua o nga take o ena reta te tikanga mo tena. Kaore aku hiahia ki te tohe i tenei mea, a ka tono atu ahau me ata waiho kia tirohia ra ano e te Pika nga kupu o te reta nei.

Te Haringi (Mr. Harding), (mema mo Kaipara).—E patai atu ana ahau, mehemea ka whakaaetia kia whakatakotoria e te Pirimia tenei reta ki runga ki te teepu, tera ranei e whai mana ia honore mema ki te panui-a-tuhituhi i tana whai korero ka mutu ka whakatakoto atu ki runga ki te teepu takoto ai?

Te Teira (Mr. Taylor), (mema mo Karaitiati).—E tu ake ana ahau ki te whai kupu mo runga i tenei motini—

Te Pika (Mr. Speaker).—Ki taku mohio me matua whakatau e au mehemea e tika ana te motini kaore ranei. Ki taku mahara kaore pea i te tika. E kite iho ana ahau he roa noa atu te reta nei, tekau ma rima pea ianei nga wharangi he mea patupatu puputu ona raina ki te mihini. Kei te hawhe paahi o te whitu ka whakapuakina e au taku kupu whakatau.

Haere tonu nga mahi a no te tekau meneti te paahitanga o te tahi karaka i te po ka hiki te Whare.