No te hawhe-paahi i te rua karaka ka noho te Pika ki runga ki tona nohoanga.

Ka karakia te Whare.

Ka whakahaerea etahi mahi a te Whare, ka mutu, ka tae ki nga patai.

Tamariki Poriro Pakeha Kei Nga Kainga Maori E Noho Ana.

Te Wirihi (Mr. Willis), (mema mo Whanganui). — Ka patai ki te Minita Maori, Mehemea e mohio aua ia he maha nga tamariki poriro Pakeha e tukutukua ana e o ratou matua Pakeha ki nga Maori, a ko aua tamariki e whakatupuria noatia ana e nga Maori, kaore e akona ana ki nga mahi kura, a ahakoa kaore e whakahengia ana e pai ana te atawhai me te manaaki a nga Maori i aua tamariki i te wa e tamariki rawa ana, a ko etahi mea takitahi nei e tangohia ana hei whangai tuturu, engari kia kaumatua haere ake kaore e pai ana te tiaki, e tirohia taunutia ana e te katoa, a tena e waiho hei tangata kino hei tangata wehi a taihoa ake nei; a mehemea ka tahuri ranei te Kawanatanga ki te whakamutu i tenei mahi kino, i te mea e tokomaha haere ake ana te nui o nga tamariki Pakeha e tukua peratia ana?

Te HonoreTimi Kara (the Hon. Mr. Carroll), (Minita Maori).—Ka whakautu, E mohio ana te Minita Maori tera etahi tamariki Pakeha ruarua nei i tangohia e nga Maori hei whangai ma ratou hei whakaora i aua tamariki i roto i te atawhaitanga kino me te whakarerenga noatanga me te mate noa iho, he nui te kaha o nga Maori ki te atawhai i aua tamariki, me te mea nei na ratou ake aua tamariki. Kei nga wahi kua whai kura e tukuna ana aua tamariki whangai Pakeka kia whiwhi tahi i tena painga rite tonu ki nga tamariki Maori. Ko te titiro taunu ki aua tamariki no te taha Pakeha ke te take o tena, a mehemea ka tupono ki tena ahua e wehingia nei, a ka waiho ratou hei tangata kino a taihoa ake nei, kati me takoto tena he ki runga ki nga tangata nana ratou i whakarere i te wa o to ratou kaha koretanga. Tena ko te taha ki nga Maori kei te tino pai kei te tino marama, e whakahaere ana te Maori i tena mahi i runga i te whakaaro karaitiana me te aroha ki te tangata, takahi kau ana pea i te ture hanga noa a te tangata mo runga i tena aronga, engari ko tona aroha ki te tangata e kore e takahia e ia. Ahakoa pea e tika ana kia araitia te mahi a nga matua Pakeha e tukutuku ana i enei tamariki ki etahi atu tangata tiaki ai, engari i mua i te hanganga rawatanga i te ture mo tena me whakarite he tiakitanga tika e manaakitia ai aua tamariki hara kore. Mehemea kei te honore mema tetahi whakaaro marama hei tohutohu mai mana mo runga i tena take ka pai tena ki te Kawanatanga hei awhina i to ratou whakaaro kua takoto nei, kia hanga he tikanga whanui e tiakina paitia ai te ora o nga tamariki ririki puta noa i tenei koroni.

Pitihana a Ruta Manuahura.

Te Herihi (Mr. Herries), (mema mo Pei o Pereti).—Ka patai ki te Minita Maori, Memehea kua pewheatia te keehi a Ruta Manuahura, i tukuna atu nei tana pitiahana ki te Kawanatanga e te Komiti mo nga Mea Maori i tera tau, kia uiuia?

Te HonoreTimi Kara (the Hon. Mr. Carroll), (Minita Maori). — Ka whakautu, Kaore kau i mahia he tikanga mo tena keehi, ko te take, ko nga tohu me nga maramatanga kei nga ringa o te Tari e mau ana e whakaatu mai ana i whakaae te kai-pitihana ki te tango i te ono tekau ma waru eka i karaatitia ki a ia hei whakaotinga rawatanga mo tana kereme.

Kooti Whenua Maori Ki Niu Paremata.

Te Mete (Mr. Smith), (mema mo Taranaki).—Ka patai ki te Minita Maori, A whea tu ai ano te Kooti Whenua Maori ki Niu Paremata, i te mea e tino hiahiatia ana kia tu ki reira?

Te HonoreTimi Kara (the Hon. Mr. Carroll), (Minita Maori).—Ka whakautu, Ka tonoa atu te whakaaro a te Tumuaki Kai - whakawa o te Kooti Whenua Maori mo runga i tena take.

Ka haere tonu etahi atu mahi a te Whare, a no te rua tekau miniti i muri i te paahitanga i te tekau ma rua karaka i te po ka hiki te Whare.