Te Honore Timi Kara (the Hon. Mr. Carroll, Minita mo nga Mea Maori). — Ka motini kia whakaturia kia tekau ma whitu nga mema mo te Komiti Whiriwhiri i nga pitihana, i nga ripoata, i nga ritaana, me nga pukapuka e pa ana ki te iwi Maori, a me whai mana ratou ki te whakahau kia tae atu ki o ratou aroaro nga tangata me nga pukapuka e tika ana; kia tokorima te korama mo te Komiti. Koia enei e whai ake nei nga tangata hei mema mo te Komiti, Te Whiira (Mr. Field), Te Pereiha (Mr. A. L. D. Fraser), Te Haringi (Mr. Harding), Hone Heke, Te Herihi (Mr. Herries), Te Auhana (Mr. Houston), Te Heningi (Mr. Jennings, Henare Kaihau, Te Meiha (Mr. Major), Te Manana (Mr. Mander), Te Moihi (Mr. Moss), Tame Parata, Wi Pere, Te Remingitana (Mr. Remington), Ta Wiremu Rahera (Sir W. R. Russell), Raiti Honore Te Hetana (Right Hon. Mr. R. J. Seddon), Te Waira (Mr. Vile), Te Wirihi (Mr. Willis), me Honore Timi Kara (Hon. Mr. Carroll).

Te Herihi (Mr. Herries, mema mo te Pei o Pereti). —Ka tu ki te korero, ko te mea tika kia rua nga Komiti mo nga Mea Maori, notemea i te nui rawa o nga pitihana me nga take Maori e tae ana ki te aroaro o te Komiti kaore e oti ana te mahi o etahi. He nui nga pitihana o tera tau me te tau i tua atu e takoto nei kaore ano i taea te mahi, apiti ki era ko nga Pire e pa ana ki te iwi Maori e tukuna atu nei ma te Komiti e whakatikatika.

Te Raiti Honore Te Hetana (the Right Hon. Mr. Seddon, Pirimia). —E tika ana, he nui te uaua, engari kaore e pai kia rua nga Komiti, engari me wehe etahi mema tokorima o te Komiti hei whakahaere i nga pitihana mama, ka ripoata atu ki te Komiti.

Whakaaetia ana te motini.