Other formats

    TEI XML file   ePub eBook file  

Connect

    mail icontwitter iconBlogspot iconrss icon

Nga Korero Paremete: 1902-1903

Wenerei, te 16 o Hepetema, 1903

Wenerei, te 16 o Hepetema, 1903.

No te hawhe-paahi i te rua karaka ka noho te Pika ki runga ki tona nohoanga.

Ka karakia te Whare.

Ka whakahaerea nga patai, ka tae ki te patai mo tetahi—

Takuta Mo Nga Maori.

Tame Parata (mema mo nga Maori o Te Waipounamu). —Ka patai ahau ki te Minita Maori, Mehemea ka whakaritea e ia he Takuta mo nga Maori e noho ana i te taha ki te raki o Waitaki, mo te wahi e karangatia nei ko Glenavy te ingoa? Kei te tino tumanako atu ahau kia tino whiriwhiria e te Minita tenei take me e kore e taea e ia te whakarite mai tetahi tikanga hei tiaki i aua tangata kia noho ora ai.

Te Honore Timi Kara (the Hon. Mr. Carroll, Minita Maori). —Kei te whiriwhiria tenei take a me te tumanako hoki o toku ngakau tera e taea te whakarite tetahi tikanga pai i runga i te hiahia o te mema honore Me ki ake ano hoki ahau ko tenei take, ara ko te whakaritenga Takuta mo nga Maori me ata whakahangai kia tika ai te tu puta noa i te koroni. Kia tae ki te mutunga o tenei tuunga o te Paremete tera pea e taea e au te hanga kia neke atu nga painga e riro mai mo nga moni e whakapaua nei i naianei hei utu i aua Takuta. Ka ata tirotirohia mariretia te taha ki nga aronga katoa o taua ahua me te whakapai me te whakatikatika i nga wahi tera e kitea e tika ana kia peratia.

Nga Tautohetohe Mo Nga Whenua Maori.

Hone Heke (mema mo nga Maori o te Tai Tokerau). —Ka patai ahau ki te Minita mo nga Mea Maori, Mehemea tera e whakahaua e ia kia tuwhera nga pukapuka i te Tari Maori e pa ana ki nga whakatautaunga me nga tautohetohetanga o muri mai i te tau 1870 mo nga whenua Maori, kia tirotirohia ai aua mea e te iwi katoa. Ko nga tautohetohe kua korerotia ake nei, ko nga mahi pera i waenganui i te Maori me te Maori mo nga take whenua papatupu kaore ano i whakawakia i whakataua e te Kooti.

Te Honore Timi Kara (the Hon. Mr. Carroll. Minita Maori). —E penei ana te whakahoki mo te patai, kaore e taea te whakaae, kei pa he raruraru. Engari me ata tono ki te Kawanatanga me te whakahua i te ingoa o te poraka me nga take i tonoa ai katahi pea ka taea te whakaae aua pukapuka kia tirohia

Haere tonu nga mahi, a no te tekau meneti ki te tahi karaka i te po ka hiki te Whare.