Komiti Mo Nga Mea Maori

Mo runga mo te Motini kia whakaturia nga mema o te Komiti mo nga Mea Maori.

H. K. Taiaroa ,—E te Tumuaki, e hiahia ana ahau kia whaikorero atu mo runga mo te Komiti mo nga Mea Maori e whakaturia nei. Kua maha oku tau e titiro ana ki nga mahi a taua Komiti e whakaturia nei i ia tau i ia tau, hei whiriwhiri i nga Mea Maori, a e mahara ana au i runga i toku mohio ki nga mema o taua Komiti o nga tau kua mahue ake nei, tae mai ki nga mema ano o naianei, me nga mema hou e whakaturia atu nei, he rangatira ratou e tahuri nui ki te mahi, ki te rapu tikanga hoki mo nga Pire me nga pitihana e tukuna atu ana ki a ratou. E mohio ana ahau, ko nga whakataunga a taua Komiti he mea ata rapu marire, he mea ata whiriwhiri whakatau ai i runga i to ratou kaha, me to ratou matauranga ki ana putake. E kore au a kaha ki te ki atu e tika katoa ana nga whakataunga. E kore ano pea e tika katoa nga mahi a te tangata, otiia ko nga whakataunga he, i he ano i runga i te pohehe. Na koia nei taku i tu ake ai, ara, ko te nuinga o nga putake uaua e ata whiriwhiria ana e te Komiti mo nga Mea Maori, a e mauria mai ana nga ripoata whakatika i nga pitihana, me te paahi o nga motini tautoko atu ano hoki a te Kaunihera i aua whakataunga a te Komiti, e tukuna atu ana aua ripoata me aua motini ki te Kawanatanga, a kaore e whakaarohia ana. E mahara ana ahau, akuanei ka pera ano, ka waiho noaiho aua ripoata i tukuna atu nei kia ata whakaarohia paitia e te Kawanatanga, a e kore e mahia mai he tikanga whakaoti i aua putake. No reira ahau i mahara ai tera pea e moumou noaiho a tatou mahi i tenei huihuinga o te Paremete. Ahakoa pewhea nga whakataunga a te Komiti, me nga motini e paahitia ana e te Kaunihera hei tautoko atu i aua whakataunga, akuanei e kore ano e whakaarohia mai e te Kawanatanga. I au ka korero tuatahi atu nei ki te Minita hou, kua tu mai nei, e mea atu ana ahau, ko toku hiahia nui tenei, kia ata whiriwhiria paitia mai e te Kawanatanga, nga Pire e pa ana ki te iwi Maori, me nga pitihana hoki, a kia ata whakaarohia paitia mai hoki e te Kawanatanga nga whakataunga a te Komiti mo nga Mea Maori, me nga motini tautoko atu hoki a te Kaunihera.

Honore Piti (Minita) , E te Tumuaki, Ko te motini i te aroaro o te Kaunihera, he mea kia whakaturia te Komiti. E kore e tika kia koero atu au inaianei mo runga mo ta Taiaroa e ki mai na,e mea na ia kaore i te ata whakaarohia e te Kawanatanga nga ripoata a te Komiti. Heoi me penei he kupu atu maku, ko toku hiahia nui tenei kia ata whakaarohia mai e te Kawanatanga a nga wa e haere ake nei nga ripoata a nga Komiti katoa, a te Komiti mo nga Mea Maori me era atu Komiti o te Kaunihera. A ki te kore e ata whakaarohia e te Kawanatanga, ka ahei noatu ia mema o te Kaunihera ki te panui ki te Kaunihera, kia mohiotia ai kaore i te whakaarohia mai e te Kawanatanga nga whakataunga a nga Komiti.