No te hawhe-paahi i te rua karaka ka noho te Pika ki runga ki tona nohoauga.

Ka karakia te Whare.

Ka whakahaerea etahi mahi me etahi Pire. Katahi ka tae ki te Pire a Meiha Tuari hei whakahau kia whakarapopototia nga pukapuka o nga Ture katoa kua paahitia e te Paremete me te rangaranga atu o nga Ture kua whakakorea e te Paremete.

Ka maha nga mema Pakeha kua korero mo taua Pire, ka tu atu ko—

Hone Heke (mema mo te Tai Tokerau). —E hiahia ana ahau ki te whakamoi i toku mahara mo runga mo te whakarapopototanga o a tatou Ture. E penei ana taku whakaaro ki te taea e te Minita te whakahau kia whakarapopototia nga Ture Maori katoa ki roto ki tetahi pukapuka kotahi, me te uru ano ki roto ki taua pukapuka nga wahi, te katoa ranei, o era atu Ture e tirohia tahitia ana me a tatou Ture Whenua Maori, ki taku mohio mehemea ka peratia ka ngawari rawa te mahi a nga tangata e mahi ana i nga mahi e pa ana ki nga Whenua Maori me nga keehi Maori. E mohio ana ahau mehemea ka hanga kia poto katoa nga Ture Maori katoa ki roto ki te pukapuka kotahi ka tino pai rawa atu.

Hooro Teone (Mr. Hall-Jones). —Ka tuhia e au ena kupu hei maharatanga maku, ki taku titiro he whakaaro tika tena, kaore ahau e mohio ana ki tetahi take e kore ai e tika kia poto katoa aua Ture ki roto ki te pukapuka kotahi.

Ka riro ma etahi mema te korero, mutu noa, a paahi noa te panuitanga tuarua o te Pire.

No te rua tekau meneti te paahitanga o te tekau ma ma o nga haora i te po ka hiki te Whare.