Tame Parata (mema Maori mo Te Waipounamu). —Ka patai ahau he aha te take i roa ai te whakaputa o nga tiwhikete taitara mo nga whenua kua hoatu nei e te Kawanatanga mo nga Maori kore whenua o nga iwi o Ngatikuia me Rangitane i Pelorus Sound, i te mea kua maha nga tau e noho ana aua Maori i runga i aua whenua, otira kaore nei ano i puta nga pukapuka taitara ki a ratou mo aua whenua? Kei te mohio te Honore Minita he uiui tonu te mahi a nga Maori i te take i roa ai. Ki toku nei whakaaro me pera ano he tikanga mo enei whenua me te whakautu mai a te Minita i puaki ake nei mo taku patai kua oti ake nei, ara, me perehi he kupu ki roto ki te Kahiti hei whakaatu ki aua Maori i te take i roa ai te whakaputa o aua taitara, a me te tohutohu atu i te huarahi e tere ai te puta o aua mea.

Timi Kara (Mr. Carroll, Minita mo nga Mea Maori) —Ko te take i roa ai, kaore ano i mutu i nga Komihana te whakariterite me te roherohe o nga whenua kua wehea nei mo nga Maori kore whenua o Te Waipounamu, kia oti ta ratou mahi, kia oti nga wawahanga whenua te roherohe, hei reira whakatautaua ai e ratou ki ia tangata me ia whanau. Otira kaore te roa o te mahi i te arai i nga Maori kia kore ai ratou e noho i runga i nga whenua kua wehea mo ratou. Kua rongo ahau kei te noho etahi o nga Maori i runga i nga tekihana kua wehea nei mo ratou, a heoi ano me manawanui kaore hoki e roa rawa kua whiwhi ratou i nga taitara mo o ratou whenua.

Te Tana (Mr. Tanner, mema mo Avon). —E utua ana ranei aua Komihana? Mehemea hoki e utua ana, tena pea he whakatupuranga ki muri ka oti ta ratou mahi.

Timi Kara (Mr. Carroll). —He Apiha Kawanatanga aua tangata, a kaore i te hoatu he moni tapiri, ra waho ranei, mo taua mahi a ratou, Kei etahi wa anake o te tau e taea ai taua mahi te whakahaere. Kaore e pau ana to ratou taima i taua mahi anake, tena ano etahi atu mahi a te Kawanatanga kei te mahia e ratou.