Tame Parata (mema Maori mo Te Waipounanm). —Ka patai ahau ki te Minita mo nga Mea Maori, He aha te take i roa ai te whakaputa o nga tiwhikete taitara mo Omaui Whenua Rahui, me era atu whenua i rahuitia mo nga Maori o Murihiku me Otakou (haunga ia nga whenua hou kua wehea nei e te Kawanatanga mo nga Maori kore whenua o aua takiwa), i te mea kua oti noa atu te whakawa te whakatau hoki e te Kooti Whenua Maori nga ingoa o nga tangata Maori no ratou aua Rahui i te tau 1887 ra ano? He maha nga tangata o toku takiwa pootitanga kua pa mai ki au— kua tuhi reta mai etahi, kua korero a page 28ngutu tonu mai etahi ki au—mo runga i tenei take. He tono tonu ta ratou mahi ki au kia kimihia e au te take i roa ai te whakaputanga tiwhikete mo aua whenua, i te mea kua oti noa atu aua whenua te whakatau ki a ratou. Ki toku whakaaro, i te mea ko te Kahiti anake te nupepa e tirotirohia ana ona korero e nga Maori o taua takiwa, no reira he mea pai pea kia panuitia e te Kawanatanga ki roto ki te Kahiti nga ingoa o aua whenua, me nga tangata no ratou aua whenua, me te take i kore ai i taea te whakaputaputa atu nga tiwhikete mo aua wahi, mehemea ra ia tena ano te take.

Timi Kara (Mr. Carroll, Minita mo nga Mea Maori). — He take tino nui i roa ai te putanga o nga tiwhikete mo aua whenua; koia tenei, me matua whakaae nga moni e takoto nei hei utu ma aua whenua katahi ano ka taea te whakaputa nga tiwhikete. E takoto nei te rarangi o aua mea i taku aroaro, e whakaatu ana i nga moni e tau ana ki runga ki aua tekihana, timata i te £2 18s. 8d. o etahi, eke noa ki te £12 o etahi. Kaati, mehemea e hiahia ana te mema honore, ka tukuna e te Kawanatanga he panui whakaatu ki aua kai-tono, mehetnea ra kaore ratou i te mohio i naianei, ara, he whakaatu ki a ratou, e riro atu ai nga taitara mo o ratou whenua, me matua utu e ratou nga riana kua oti te whakatau ki runga ki aua whenua o ratou.